VOV4.Xơ Đăng - Kơxo lơ 14/10, a tíu pêi cheăng xiâm Đảng, pôa Nguyễn Phú Trọng, Kăn xiâm pơkuâ hnê ngăn Đảng pơkuâ hneăng hôp ai ƀai pơchuât hnê mơhno tơdroăng kal a hneăng hôp tơbleăng tơdroăng Pơkâ dêi Khu xiâm kal kí ‘na mơnhông kơpong Tây Nguyên troh hơnăm 2030 séá ngăn tơdroăng cheăng vâ pêi troh hơnăm 2045. Kơpong Tây Nguyên ai 5 to kong pơlê mê cho: Kon Tum, Gia Lai, Dak Lak, Dak Nông ƀă Lâm Đồng châ ‘nâi troh môi tiah môi kơpong tơnêi ai tơdroăng hơ’muăn ing nah, cho tíu rơtế rêh ối cheăng kâ dêi vâ chê 6 rơtuh ngế dêi tâi tâng 53/53 hdroâng kuăn ngo nhŏng o dêi lâp tơnêi têa.

Tâ tá hneăng hôp

Tơbleăng hnê mơhno a hneăng hôp, pôa Nguyễn Phú Trọng tối nhên: Kơpong Tây Nguyên cho tíu ki kal ‘na cheăng kâ, rêh ối, hyôh kong prâi, nhâ loăng, kuăn kiâ, ‘na cheăng lêng kring gak tơniăn ƀă ‘na tơpui kâ dêi lâp tơnêi têa. Mơnhông mơdêk Tây Nguyên rĕng, krá tơniăn ton cho troăng hơlâ ki kân dêi Đảng, Tơnêi têa ƀă cho hnoăng cheăng pêi ki kal dêi lâp tơnêi têa.

Mơjiâng ƀă mơnhông mơdêk kơpong Tây Nguyên thế tơrŭm tơtro pơla mơnhông mơdêk cheăng kâ, mơhno túa lĕm tro rêh ối pơlê pơla, rak vế tơmeăm khoăng, hyôh kong prâi, rơtế tơrŭm krá ƀă pro tơniăn cheăng lêng - kring tơniăn ƀă mơdêk tơdroăng tơpui kâ. Tơmâng xo mơnhông mơdêk cheăng kâ, rêh ối pro xiâm ăm tơdroăng kring tơniăn cheăng lêng, kring tơniăn pơlê tơnêi têa, tơniăn cheăng kal kí - rêh ối pơlê pơla.

VOV/Tơplôu: Gương