VOV4.Xơ Đăng - Hâi lơ 18/9, a Hà Nội, pôa Vương Đình Huệ, Kăn xiâm hnê ngăn Kuô̆k hô̆i pơkuâ ƀă xông tơpui a Hneăng hôp tơpui tơno cheăng kâ – rêh ối pơlê pơla Việt Nam hơnăm 2022. Xông tơpui mơgêi a Hneăng hôp tơpui tơno, pôa Vương Đình Huệ tối, Hneăng hôp tơpui tơno hiăng mơnhên tơdroăng ki ôh tá tơniăn, thăm pêi cheăng tơdroăng kâ kân, thăm mơdêk ivá kâi trâng ƀă xông tơtêk dêi tơdroăng cheăng kâ đi đo cho pơkâ má môi.

Hneăng hôp tơpui cheăng kâ – Rêh ối pơlê pơla Việt Nam hơnăm 2022

Hneăng hôp tơpui tơno xuân môi tuăn kal pơtối kêi đeăng troăng hơlâ luât, ki rơhêng vâ tối ki ahdrối cho tơkŭm kêi đeăng luât ‘na tơnêi tơníu. Klêi kơ’nâi mơgêi Hneăng hôp tơpui tơno, Khu tơkŭm po hneăng hôp tơpui tơno kô mơjiâng tơbleăng tối pơtroh Kuô̆k hô̆i, Chin phuh, mâu Khu cheăng, Khu xiâm, kơvâ cheăng ƀă kong pơlê vâ pêi pro teăm tơdrêng roh hôp má 4, Kuô̆k hô̆i hneăng má XV ƀă mâu tơdroăng pơkâ pêi, pêi pro troăng pơkâ pêi, troăng hơlâ mơnhông cheăng kâ – rêh ối pơlê pơla dêi tơnêi.

A Sa Ly tơplôu ƀă tơbleăng