Kơxo lơ 23/12, Khu tơkŭm po Festival reăng Đà Lạt rôh má 9 hơnăm 2022 hiăng tơkŭm po hneăng hôp tơpui ‘na khoa hok pơtối rak vế ki pơxúa dêi inâi pơlê kong kơdrâm Festival Reăng Đà Lạt  ƀă túa pêi cheăng tơpui kâ dêi mơngế Đà Lạt “Têm rơpiât, lĕm, pâ hlế kơ tơmối’’. Lối 150 ngế kăn teăng mâ mâu tíu pêi cheăng, kơvâ cheăng  kong pơlê Lâm Đồng, mâu khu cheăng khoa hok, khu tí tăng ‘nâi plĕng, khu mơdró tung tơnêi têa veăng leh. Hneăng hôp hiăng mơdoh hên chôu tối tơbleăng, tơpui tơno ƀă hnê tối rơtâ tá mâu tơdroăng ‘na ki pơxúa inâi pơlê kong kơdrâm Festival reăng Đà Lạt, mâu ngế ki tơdjâk troh ki môi tuăn dêi tơmối ƀă mâu tíu ôm hyô Đà Lạt, môi túa ôm hyô ki rơkê vâ mơdêk ki vâ ‘nâi dêi tơmối ôm hyô a pơlê kong kơdrâm reăng.

Tối tơbleăng a hneăng hôp, pôa Tôn Thiện San, Kăn hnê ngăn Vi ƀan pơlê kong kơdrâm Đà Lạt tối, ing mâu tơdroăng cheăng dêi Festival Reăng Đà Lạt, tơdroăng cheăng pêt reăng cho ki rơdêi kal châ ‘no liăn, tí tăng ‘nâi, veăng mơnhông cheăng kâ ƀă mơdêk ki pơxúa dêi tơmeăm pêi lo dêi kơvâ pêt reăng.