Hâi lơ 4/11, a Dak Lak, Khu ngăn ‘na kŏng ngê̆ sinh hok Việt Nam tơrŭm ƀă hngêi trung Đăi hŏk Tây Nguyên tơkŭm po hneăng Hôp tơpui ‘na kŏng ngê̆ sinh hok tung lâp tơnêi têa hơnăm 2022. Lối 500 ngế cho mâu ki cheăng ‘na khoa hok , mâu kăn ƀô̆ rak ngăn, thái cô hnê râ ki kân, mâu ngế tí tăng ‘nâi plê̆ng lo ing mâu hngêi trung đăi hŏk,  Tíu xiâm tí tăng ‘nâi plĕng tung kơvâ cheăng ‘na kŏng ngê̆ sinh hok tung lâp tơnêi têa hiăng veăng hôp.

Mâu hlá mơ-éa chêh tơbleăng tối a hneăng hôp hiăng chêh mâu tơdroăng ki xiâm dêi kŏng ngê̆ sinh hok, môi tiah: Tế bào gốc, kih thuâ̆t ‘mâi rơnêu hơ’lêh gen, kih thuâ̆t tối nhên ‘na DNA rơxông nếo, tí tăng ‘nâi plĕng kơmăi kơmok tung khăm pơlât, păn tơnăng ká xi xŏng ƀă pêi chiâk. Hneăng hôp cho tíu tơkŭm tơpui tơno ‘na khoa hok kŏng ngê̆ vâ mâu khu cheăng ‘na khoa hok, mâu thái kô hnê râ kân, tí tăng ‘nâi plĕng mâu tơdroăng, mâu ngế hriâm ƀă mâu sinh viên ki lo ing mâu hngêi trung đăi hŏk, tíu xiâm tí tăng, mâu kŏng ti ƀă khu mơdró pêi tơdroăng cheăng ‘na kŏng ngê̆ Sinh hok ƀă mâu tơdroăng tơdjâk troh trâm mâ, tơpui tơno, tơbleăng tơdroăng hiăng pêi pro, hnoăng tí tăng 'nâi plê̆ng ki nếo, cho rôh vâ tơdjêp, tơrŭm rơtế mơnhông mơdêk mâu tơdroăng tơmiât nếo tí tăng ‘nâi plĕng, trâu rơdâ, dêi kơvâ cheăng.