A pơlê kong xiâm Paris, kong têa Pơhlăng hiăng tơkŭm po Hneăng hôp tơpui tơno khoa hok ƀă dó inâi ‘’Têa kơxĭ Biển Đông ƀă tơdroăng hnoăng pơkuâ dêi Việt Nam’’ veăng amê ai kơdrâm ngế rơkê ƀă mâu ngế hâk vâ têa kơxĭ rơlố Việt Nam. Xông tơpui a leh pơxiâm po, pôa Đinh Toàn Thắng, Kăn teăng mâ Việt Nam a kong têa Pơhlăng kheăn kơdeăn tơdroăng mơ-eăm dêi mâu ngế krê ƀă  khu  ngế rơtế veăng vâ tơkŭm po hneăng hôp tơpui tơno.

Kăn teăng mâ tối kố cho tơdroăng ki kal kân ƀă kuăn pơlê Việt Nam rêh ối pêi cheăng a kong têa ê, ki rơhêng vâ tối cho kuăn pơlê rêh ối pêi cheăng a Châu Âu, mơhno tơdroăng tuăn pâ ƀă tơdroăng ki veăng kum dêi kuăn pơlê pin ƀă  pơlê xiâm, tơnêi têa, ƀă mâu tơdroăng ki kân dêi tơnêi têa, hdroâng mơngế. Mâu tham luâ̆n hiăng tối hên troh tơdroăng ‘na têa kơxĭ Biển Đông ƀă  hnoăng pơkuâ têa kơxĭ Việt Nam, séa ngăn tiô tơdroăng mơnhông mơdêk khôi túa lĕm tro, kal kí ƀă luât.

Têa kơxĭ ƀă mâu hnoăng pơkuâ rơlố đi đo cho tơdroăng ki rơhêng vâ tơmâng ôh tá tá xê to ƀă Việt Nam mê cho ƀă tâi tâng mâu kong têa ai tơkăng kong a têa kơxĭ. ƀă 14 tham luâ̆n châ tối tơbleăng, hneăng hôp tơpui tơno hiăng kum djâ troh kuăn pơlê mâu tơdroăng ví ngăn ƀă mâu troăng tơmiât pêi rơkê vâ rơtế dêi pó mơjiâng bă mơnhông mơdêk tiô tơdroăng nhuô̆m hnoăng pơkuâ ƀă tơnêi tơníu dêi pó.