VOV4.Xơ Đăng - Kơxo lơ 4/10, a Hà Nội, Viê̆n Hàn lâm khoa hok pơlê pơla Việt Nam tơkŭm po hneăng hôp tơpui tơno khoa hok ‘’Khoa hok pơlê pơla khôi túa mơngế hluâ 10 hơnăm pêi pro Pơkâ 20 ‘na mơnhông mơdêk khoa hok ƀă kŏng ngê̆’’. Tiô mâu kăn teăng mâ, sap ing châ tơbleăng ăm pêi pro, Pơkâ 20 hiăng pro tơ’lêi hlâu ƀă xiâm kối ăm mơnhông mơdêk khoa hok ƀă kŏng ngê̆ tung lâp tơnêi têa.

Ing mê, tơbleăng ăm tơdroăng vâ mơnhên teăm tơdrêng tung tơdroăng mơdêk ivá pơkuâ dêi Đảng ƀă ki xêt khât, châ tơƀrê tơdroăng pêi cheăng dêi khu cheăng kal kí; pơ’lêh nếo troăng mơnhông cheăng kâ; ai hên tơdroăng veăng kum păng ‘nâng tung rak tơniăn kal kí ƀă pơkâ mâu troăng pơkâ pêi, troăng hơlâ pơ’lêh nếo troăng tơtêk, mơdêk ki dâi lĕm tơtêk, mơdêk pêi lo tơmeăm khoăng ƀă ivá tơbriât cheăng dêi tơdroăng cheăng kâ; mơjiâng mâu khu tơrŭm cheăng, khu pú hên khoa hok pơlê pơla ƀă khôi túa mơngế rơdêi, mâu ngế cheăng khoa hok ối a ko kơvâ cheăng.

Hneăng hôp tơpui tơno khoa hok rêh ối pơlê pơla khôi túa mơngế hluâ 10 hơnăm pêi pro Pơkâ 20

Laga tung tơdroăng pêi pro pơkâ xuân ối hên tơdroăng ki mơdât. Hên tơdroăng dêi mâu ngế cheăng khoa hok châ ngăn cho tơdroăng pêi cheăng khoa hok; kal: Pơtối pơ’lêh nếo troăng tơmiât, hlê plĕng ‘na hnoăng, tíu pêi cheăng dêi khoa hok pơlê pơla ƀă khôi túa mơngế; ai tơdroăng mơ’no troăng tơmiât tơxâng ƀă ki kal dêi kơvâ cheăng; mơjiâng khu ngế rơkê; pêi pro nhên mâu troăng hơlâ luât vâ tơleăng mâu tơdroăng ối tơvâ tơvân tung pơkâ 20.

VOV Tây Nguyên/Tơplôu: A Sa Ly