VOV4.Xơ Đăng - Klăng roh Khu râ kăn xiâm Kuô̆k hô̆i kong têa Lếo lăm pôu ƀă pêi cheăng a Việt Nam ƀă veăng mâu tơdroăng pêi cheăng ‘’Hơnăm tơrŭm nhŏng o môi tuăn’’ leh tơbâ 60 hơnăm Hâi mơjiâng tơrŭm tơpui kâ ƀă 45 hơnăm Hâi kĭ tơkêa nhŏng o môi tuăn ƀă Tơrŭm Việt Nam – Lếo, a kơxê lơ 19/7, Khu râ kăn teăng mâ Kuô̆k hô̆i Việt Nam xua pôa Trần Thanh Mẫn, Kăn cheăng tung Khu xiâm kal kí, Kăn xiâm phŏ hnê ngăn Kuô̆k hô̆i pơkuâ xiâm khu râ kăn hiăng ai roh tơpui tơno ƀă Khu râ kăn teăng mâ Kuô̆k hô̆i kong têa Lếo xua pôa Xủn-thon Xay-nha-chắc, Kăn xiâm phŏ hnê ngăn Kuô̆k hô̆i kong têa Lếo pơkuâ xiâm.

Ƀă pói vâ đi đo mơdêk tâ mê nếo tơrŭm cheăng pơla péa tơnêi têa tung la ngiâ, péa Kuô̆k hô̆i môi tuăn kơjo pêi pro châ tơƀrê môi tuăn pơla péa Khu xiâm kal kí hơnăm 2022, Môi tuăn tơrŭm pơla péa Kuô̆k hô̆i; Thăm tơpui tơno ‘na túa ki rơkê tơtro mơjiâng troăng hơlâ, luât tung pơkuâ kân ƀă rak  tơniăn cheăng kâ – rêh ối pơlê pơla tung tơdroăng '‘tiah hmâ nếo’’; thăm mơnhông châ tơƀrê tơrŭm cheăng ‘na têa châu têa kơxăng, hyôh on gas, on tơhrik, hnê mơjiâng mơngế, khăm pơlât, trâm mâ pơla kuăn pơlê ƀă tơrŭm pơla mâu kong pơlê, ki má lối cho tơrŭm pơla mâu khu râ kăn teăng mâ Kuô̆k hô̆i, Hô̆i đong kuăn pơlê mâu kong pơlê péa tơnêi têa.

A Sa Ly tơplôu ƀă tơbleăng