Hâi lơ 20/10, a pơlê kong kơdrâm Ƀuôn Ma Thuột, kong pơlê Dak Lak, Khu xiâm pơkuâ ‘na pêi chiâk deăng ƀă mơnhông mơdêk thôn pơlê tơkŭm po ‘’Hneăng hôp tơpui tơno pêi chiâk deăng tơrŭm pơla loăng pơlái kong kế kuăn kiâ kong kong prâi: Troăng kơdroh mơ’no trếo ‘mêi lo pakong kong prâi ƀă mơnhông mơdêk pêi chiâk deăng krá tơniăn’’. Apoăng hơnăm kố, Ngế pro xiâm hnê ngăn Chin phuh hiăng kĭ ‘’Troăng ton xŏn mơnhông mơdêk pêi chiâk deăng ƀă thôn pơlê krá tơniăn, hneăng hơnăm 2021 – 2030, tơmiêt pêi troh hơnăm 2050’’ hiăng châ mot khế 1/2022, ƀă pơkâ xiâm ‘’Mơjiâng tơdroăng pêi chiâk deăng pêt mơjiâng tơmeăm khoăng, tơniăn tơdroăng bê kế kâ tơnêi têa, kum kal khât tung tơniăn cheăng kâ – rêh ối pơlê pơla, rak vế kong prâi, hbrâ ví ƀă kong prâi hơ’lêh. Vâ pêi pro châ troăng pêi ton xŏn ƀă mâu tơkêa lâp plâi tơnêi, tơdroăng kơdroh trếo ‘mêi lo pakong tung pêt mơjiâng tơmeăm ai hnoăng kal khât.

Tâi tâng hneăng hôp tơpui tơno

A hneăng hôp tơpui tơno, hên rơkong tơpui tối ‘na pơkâ pêi troăng hơlâ thăm mơnhông pêi chiâk deăng tơrŭm loăng pơlái kong kế kuăn kiâ kong. La ngiâ, khu râ kăn pơkuâ Khu xiâm pơkuâ ‘na pêi chiâk deăng Mơnhông mơdêk thôn pơlê poí vâ mâu tơdroăng pêi ki nôkố thăm mơhnhôk tơmiêt troh môi tơdroăng pêi chiâk deăng tơrŭm pơla loăng pơlái kong kế kuăn kiâ kong thôn pơlê tiô rơxông nếo, kuăn pơlê pêi chiâk deăng rơkê.