Cho tơdroăng ki po apoăng ăm Măng tĭng khu tê mơdró kŭn ƀă krâ kơvâ kong pơlê Lâm Đồng ƀă dó inâi "Pơ'lêh péa tơdroăng ngiât lĕm ƀă kơxô̆", Hneăng hôp mê veăng ai dêi mâu khu pơkuâ rak ngăn, khu ki rơkê plĕng rơtế ƀă lối 100 khu tê mơdró krâ kơvâ ƀă kŭn kong pơlê Lâm Đồng. Hneăng hôp vâ tŏng kum mâu khu mơdró kâ mơdêk hlê plĕng, tơmiât pêi rơkê, hlê plĕng nhên tơdroăng tơrŭm pơla Tơnêi tơníu, Pơlê pơla ƀă Pơkuâ ngăn khu mơdró kâ (ESG) nôkố cho tơdroăng ki pơklât thế.

Kong pơlê Lâm Đồng nôkố ai lối 30.000 khu mơdró, ki hên cho khu mơdró kŭn ƀă krâ kơvâ, ƀă kơchơ mơdró tê tơmeăm ngi kong têa ê troh mâu kong têa châu Á châ lối 60%; châu Âu 26%; ki u ối cho mâu kong têa ki ê. Mâu ngế rơkê tối tiah kố, vâ prôk hơngế tâ mâu khu mơdró dêi Lâm Đồng ôh tá xê to pơtê a tơdroăng "ai kế tơmeăm vâ tê" mê thế pêi khŏm "ai kế tơmeăm tơxâng vâ tê tiô pơkâ dêi kơchơ mơdró, ai tơdroăng chêh 'măn tung kơmăi vâ mơnhên, ai khu pơkuâ rak vâ séa ngăn ƀă ai ivá kâi tơpui tơno ƀă khu tơrŭm cheăng".