Pôa Phạm Minh Chính, Ngế pro xiâm hnê ngăn tơnêi têa veăng Hôp mâu Kăn xiâm tiô troăng rơhlâ tơrŭm cheăng kâ Ayeyawady-Chao Phraya-Mekong rôh má 10, hneăng Hôp mâu Kăn xiâm Tơrŭm cheăng pơla Kul - Lếo - Myanmar - Việt Nam rôh má 11 ƀă pêi cheăng a Sinuâ. Hneăng lăm pêi cheăng rôh kố dêi pôa Phạm Minh Chính, Ngế pro xiâm hnê ngăn tơnêi têa troh Sinuâ châ tơngah tối tơbleăng hên tơdroăng ki ai pơxúa troh mâu kơpong ƀă mâu kuăn pơlê tung lâp plâi tơnêi.

Hneăng lăm pêi cheăng xuân vâ pơtối rak vế ki mơnhông tơniăn lĕm tơrŭm cheăng  pơla Việt Nam - Sinuâ, pơtối pơhlêh thăm hlê plĕng tơdjuâm tơrá kăn xiâm péa pâ châ tơpui rơhé tung hneăng lăm pôu Sinuâ dêi pôa Tô Lâm - Kăn xiâm pơkuâ hnê ngăn Đảng khế 8/2024 kố nah; pơtối rak tơpui tơno, trâm mâ tơrá mâu kăn, mơdêk lo nhoăm dêi rơpó tơdroăng kal kí, mơdêk tơrŭm hên tâ nếo pơla péa tơnêi têa, mơnhông Việt Nam - Sinuâ, tá râ xiâm ƀă kong pơlê, mơnhông tơniăn, krá ton.