Kơxo lơ 6/6, a pơlê kong kơdrâm Đông Hà, kong pơlê Quảng Trị tơrŭm ƀă Hok viê̆n Chĭn trĭ Kuô̆k ya Hồ Chí Minh ƀă Ƀơrô Chin phuh tơkŭm po Hneăng hôp tơpui tơno khoa hok râ Xiâm ’’Tơmeăm mơnhên tơdroăng mơnhông mơdêk ƀă hnoăng dêi Chin phuh Kăch măng mê nah rơxông Kŏng hòa peăng Hdroh Việt Nam tung roh tơplâ xâ Mih, tŏng kum tơnêi têa’’.

Khu tơkŭm po Hneăng hôp tơpui tơno hiăng châ tơdah lối 40 tham luâ̆n dêi mâu ngế ki châ hlo tơdroăng mơnhông tơnêi têa ƀă mâu khoa hok. Tíu ƀă tơdroăng ki mơnhông tơtêk dêi tơdroăng mơnhông mơdêk djâ Quảng Trị chiâng kơpong tơnêi ai hnoăng ki xiâm ‘na kal kí, cheăng lêng tung tơdroăng mơjiâng tơnêi têa ƀă rak tơnêi têa.

Tíu kố cho môi rơxông châ ngăn cho ‘’tíu tơplâ’’, ‘’gâk kring tơkăng’’, tíu a ko tơnêi têa’’, tung mê tơdroăng mơnhông hiăng chôu vế môi rơxông cho tíu pro tíu pêi cheăng Chin phuh kăch măng roh mê nah dêi rơxông Kŏng hoa peăng Hdroh tơnêi têa Việt Nam sap hơnăm 1973.

Pôa Nguyễn Đăng Quang, Kăn phŏ pơkuâ hnê ngăn cheăng Đảng kong pơlê Quảng Trị tối pói vâ, ing hneăng hôp tơpui tơno kố, mâu mơ-éa ki kal, luâ̆n cứ khoa hok kô châ tơpui tơno, mơnhên vâ pro mơnhên tơ’nôm ‘na tơmeăm mơnhên tơdroăng ki mơnhông mơdêk tơnêi têa, hnoăng dêi Chin phuh kăch măng mê nah Kŏng hoa peăng Hdroh Việt Nam tung roh tơplâ xâ Mih, tŏng kum tơnêi têa.