Kŏng ti Hngêi kơmăi on tơhrik Ialy pơkuâ ngăn 3 toăng hngêi kơmăi on tơhrik ki kân tung mâu hngêi kơmăi on tơhrik kroăng Sê San, mê cho: Hngêi kơmăi on tơhrik Ialy, Hngêi kơmăi on tơhrik Sê San 3, ƀă Hngêi kơmăi on tơhrik Plei Krông a kong pơlê Gia Lai ƀă Kon Tum. Tâi tâng ki têi dêi 3 toăng hngêi kơmăi kố cho 1.080 MW, tung tâi tâng tơdroăng pơkâ riân troh lơ 30/6/2023 dêi 3 toăng hngêi kơmăi hiăng ‘no lối 102 rơtal 246 rơtuh kWh.

Laga, tung 6 khế apoăng hơnăm 2023, tâi tâng kŏng ti mơ’no châ 1 rơtal 955 rơtuh kWh on tơhrik, châ 41,68% túa pơcháu, kơdroh 330 rơtuh kWh tâng pơchông ƀă khế kố hơnăm 2022.

Cho hngêi kơmăi on tơhrik ki kân má môi tung mâu hngêi kơmăi on tơhrik kroăng Sê San, Hngêi kơmăi on tơhrik Ialy hiăng pêi pro tro hnoăng cheăng dêi hngêi kơmăi ai hên tơdroăng pơkâ: Mơ’no on tơhrik, mơ’no têa, pro kơdroh ‘na têa kân troh a rơnó mê hngê; mơ’no têa ăm peăng hdroh tung pơla rơnó tô. Tơdrêng amê hlối kum mơ’no bê têa ăm tơdroăng ki tôh kế tơmeăm peăng hdroh xuân môi tiah tăng xo mâu kơnhŏng têa ăm tơdroăng ki mơ’no on tơhrik.

Pôa Đinh Viết Thiện, kăn phŏ pơkuâ Kŏng ti Hngêi kơmăi on tơhrik Ialy tối:

“Rơnó tô hơnăm kố hlo kong prâi ôh tá tơniăn khât, mot tung mâu khế mơ’nui rơnó mê hngê mê têa xiâ. Mot tung mâu khế 3 ƀă khế 4 mê têa tung long rế iâ tâ, ki têi xia vâ chê 90%. Mê ai roh têa tung long xiâ ó khât vâ rak vế têa, xuân môi tiah têa ki ai vâ mơ’no ăm peăng hdroh tro tiô pơkâ dêi long. Peăng kŏng ti hiăng ai hlá mơéa tơbleăng ăm mâu kơ koan pơkuâ ngăn tơnêi têa, kơ koan râ kơpêng cho grup pơkuâ xuân môi tiah Vi ƀan hnê ngăn kong pơlê Gia Lai ƀă Kon Tum pơkâ thế tí tăng bro tiah lâi vâ xing xoăng têa, rak tơniăn tro mâu tơdroăng mơ’no têa ăm tơdroăng ôu kâ, hum roh ăm kuăn pơlê xuân môi tiah mơ’no têa ăm tơdroăng ki pêi chiâk deăng. Troh lơ 30 khế 6 tơdroăng ki pơtối rak têa vâ tơniăn bê têa hiu troh peăng hdroh xuân châ hơ’lêh”.

Pôa Hồ Trung Đông, kăn pơkuâ hnê ngăn Đảng, kăn pơkuâ Kŏng ti bro hngêi kơmăi on tơhrik Sê San ăm ‘nâi: Rơnó tô hơnăm kố têa a mâu long hlo xiâ tâng vâ pơchông ƀă tiah hmâ dêi hơnăm, xiâ troh 15% tâng pơchông ƀă hơnăm 2022. Tung pơla nôkố hngêi kơmăi on tơhrik pêi pro châ tơdroăng ki vâ tê ăm tâi tâng mâu tơdroăng pâ thế dêi khu pơkuâ tơnêi têa. Tơdroăng ki phá tơ-ê a hngêi kơmăi on tơhrik Sê San cho ai long mơ’no têa tơniăn peăng pa rŏng tua-ƀin ki mơ’no on tơhrik. Xua mê tơdroăng ki mơ’no têa ăm peăng hdroh châ hbrâ rơnáu gá iâ tơdjâk troh tơdroăng ki bro chiâng on tơhrik.

Pôa Hồ Trung Đông tối:

“Tung pơkâ ‘na long têa 215 dêi Ngế pro xiâm hnê ngăn Chin phuh hơnăm 2018, ai pơkâ ƀă ăm ngin ‘na rơnó tôu ngin athế pêi pro châ ki tro cho 195 met khô̆i/yâi ăm peăng hdroh. Tung pơla xúa mê ngin ai môi to long têa xing xoăng vâ pơkâ tơleăng tơdroăng ki ngin tối tơbleăng hên mê kơdĭng têa a mê, ƀă rôh ngin ôh tá mơ’no tơhrik mê kô mơ’no sap ing long têa xing xoăng ing Sê San 4.

Tung pơla hdrối kố nah, ngin kô pêi pro tơdroăng ki pơkâ thế ‘na tơdroăng mơ’no têa ăm peăng hdroh vâ rak tơniăn bê têa ăm kroăng Mekong. Tơdrêng amê hlối ai mâu tíu pơkâ ki kơtăng má môi, drêng ôh tá bê têa vâ mơ’no on tơhrik tiô troăng pơkâ mê ngin hbrâ rơnáu tối tơbleăng ăm Vi ƀan kroăng Mekong, hbrâ rơnáu tối tơbleăng ăm Khu xiâm ngăn kong kế tơmeăm khoăng vâ rêm pâ tơrŭm ƀă dêi rơpó tung hnoăng cheăng pơkuâ".

Kŏng ti Hngêi kơmăi on tơhrik Ƀuôn Kuốp pơkuâ ngăn 3 toăng hngêi kơmăi on tơhrik tung mâu hngêi kơmăi on tơhrik Srêpok pơla péa to kong pơlê Dak Lak ƀă Dak Nông, mê cho: Hngêi kơmăi on tơhrik Ƀuôn Tuôr Srah, Hngêi kơmăi on tơhrik Ƀuôn Kuốp ƀă hngêi kơmăi on tơhrik Srêpok 3.  Tâi tâng ki têi dêi 3 toăng hngêi kơmăi on tơhrik kố ai 580 MW.

Pôa Nguyễn Đức, Kăn phŏ pơkuâ Kŏng ti Hngêi kơmăi on tơhrik Ƀuôn Kuốp ăm ‘nâi: 6 khế hdrối nah, tâi tâng on tơhrik dêi 3 toăng hngêi kơmăi kố cho 915 rơtuh kWh on tơhrik, bu tơ’mô ƀă 79% tâng pơchông ƀă khế kố hơnăm 2022. On tơhrik kơdroh cho kơdró têa sap ing mơ’nui rơnó mê hngê, ƀă rế xiâ tâ nếo a mâu khế 3 ƀă khế 4 pơla hdrối kố nah. Laga tơdroăng ki mơ’no tiô pơkâ pơla long dêi Hngêi kơmăi on tơhrik Ƀuôn Kuốp xuân ối pêi pro châ tiô pơkâ.

“Kŏng ti hiăng hbrâ rơnáu tơrŭm ƀă tíu xiâm séa ngăn on tơhrik tơnêi têa vâ mơ’no têa rak tơniăn tơdroăng ki rơhêng vâ xúa ăm kơpong peăng hdroh. Troh khế 5 kơdró têa gá kô xiâ mâu long têa peăng kơnhŏng Ƀuôn Tuôr Srah, Kŏng ti hiăng tối tơbleăng troh Vi ƀan hnê ngăn kong pơlê vâ ai troăng hnê mơhno mơjiâng bro xuân môi tiah pêi pro ăm tơtro.

Tung khế 5 Vi ƀan hnê ngăn kong pơlê hiăng pơcháu ăm Khu ngăn cheăng kơmăi kơmok ƀă tê mơdró pơkuâ pêi cheăng ƀă kŏng ti. Tiah mê tơdế khế 5, hiăng ai túa pơkâ môi tuăn cho mơ’no têa ăm peăng hdroh a khế 5, mê kơdró têa tung long Ƀuôn Tuôr Srah hiăng ai têa tro kơlo pơkâ dêi tơdroăng mơ’no têa ing long”.