VOV4.Xơ Đăng - Hâi lơ 15/9, a pơlê kong kơdrâm Plei Ku, Hngêi pơkeăng kân kong pơlê Bình Định ƀă Hngêi pơkeăng kân kong pơlê Gia Lai tơkŭm po leh kĭ tơkêa mơ-éa chôu vế ƀă tơkêa tŏng kum khăm – pơlât, hnê kih thuât ‘na tơdroăng cheăng tung kơvâ khăm, pơlât. Hngêi pơkeăng kân kong pơlê Gia Lai nếo châ mơ’no liăn rôe kơmăi DSA rơxông nếo. Kơmăi DSA xúa ki trâ X xup troăng mơheăm tung châ ƀă xúa mâu kih thuât mot tung châ veăng pơlât ing xiâm troăng mơheăm mê ôh tá kal po kéa hơ’nêh.

Hngêi pơkeăng kân kong pơlê Bình Định tŏng kum Gia Lai ăm kơtâu kơmăi DSA

Nôkố, kơmăi DSA chal nếo hiăng châ krâ a Khoa Tim mạch, Hngêi pơkeăng kân kong pơlê Gia Lai. Pôa Phạm Bá Mỹ, Kăn pơkuâ Hngêi pơkeăng kân kong pơlê Gia Lai tối ăm ‘nâi, tơdroăng tơrŭm tŏng kum khăm – pơlât, hnê kih thuât pơla péa hngêi pơkeăng kô kum kong pơlê Gia Lai ai tơ’nôm tơmeăm vâ pêi pro mâu kih thuât rơxông nếo, mơdêk ki hôm tung khăm – pơlât tơdrêng ăm kuăn pơlê tung kong pơlê tối krê, kuăn pơlê mâu kong pơlê achê mê tối tơdjuôm, kơdroh tơdroăng pơtroh pơlât a hngêi pơkeăng ki ê.

A Sa Ly tơplôu ƀă tơbleăng