Hngêi trá lĕm a tơdế Pơlê kong xiâm Hà Nội cho tíu Pôa Hồ rêh ối ƀă pêi cheăng ton má môi tung rơxông  kăch măng dêi tơná. Tíu kố hiăng ăm hlo to lâi tơdroăng kal sap ing nah, ai pơxúa ki kân tung mâu rôh mơ’nui tung rơxông kăch măng dêi Pôa. A hngêi trá kố, a mâu hơnăm xâ Mih to lăm plâ ó peăng Kơnhŏng, hâi lơ 17/7/1966, Pôa Hồ hiăng ối ‘nâi chêh kơthô krếo thế kuăn pơlê mơ-eăm tơplâ xâ Mih.

Xuân a tíu kố, sap hơnăm 1965 troh hơnăm 1969, Pôa hiăng mơdoh chôu  chêh  mâu tơdroăng kal hdrối vâ lêk lôi hên tơdroăng pâ kuăn pơlê, tâi tâng Đảng, tâi tâng mố đô̆i, ăm mâu vâi hdrêng mâu phô̆m xông kân ƀă vâi  hdrêng. Ƀă xuân ing tíu kố, Pôa hiăng prôk.

Hdrối mê hiăng ai 4 hơnăm pêi cheăng kring gak, kring ngăn Pôa ƀă lối 30 hơnăm kơ’nâi mê rơtế hbrâ ƀă tơdroăng kring vế, pơtối rak tơmeăm khoăng Hồ Chí Minh tung Kơpong tíu tơbâ Kăn xiâm hnê ngăn tơnêi têa, pôa Trần Viết Hoan, Ngế pơkuâ Kơpong tíu tơbâ  Pôa Hồ Chí Minh - Kăn xiâm hnê ngăn tơnêi têa ki apoăng a Tíu pêi cheăng dêi Kăn xiâm hnê ngăn tơnêi têa tối:

 “Hngêi Trá Pôa ối pêi cheăng 11 hơnăm, kố cho rôh ki pơkâ ƀă tơdroăng rêh ối dêi Đảng ƀă tơnêi têa. Pôa cho Kăn xiâm hnê ngăn pêi hên tơdroăng cheăng. Tíu kố ôh tá krip tơdrŏm, la hngêi trá dêi Pôa môi tiah tơdroăng hơ’muăn hiăng chôu pâ tung hiâm mơno rêm ngế.

Hngêi trá dêi Pôa bú ai pái veăng, la tung pơla hiâm mơno dêi Pôa dế mê nah mê hngêi kuăn mê xuân ai khía pê hói hói ƀă eăng bâ, xú lĕm reăng dêi  Pôa. Pa xôp hngêi trá mê, Pôa Hồ dêi pin rêm kơmăng ôh tá koi, tơchĕng tơmiât ‘na kăch măng Peăng Hdroh, tơmiât troh Kăch măng Peăng Kơnhŏng ƀă tơmiât troh ‘na tơrŭm môi tuăn tung  lâp plâi tơnêi. Mâu hơnăm ối amê Pôa Hồ hiăng tơbleăng troăng rơhlâ ki rơkê khât, troăng rơhlâ vâ pro tơniăn djâ kăch măng Việt Nam prôk ing ƀlêi trâng kố troh ƀlêi trâng ki ê’’.

Yăo sư Hoàng Chí Bảo tối tiah kố , hngei trá mơhno nhên tơdroăng rêh ối ki tơdrăng lĕm ƀă tơ‘lêi hlâu dêi Pôa:

 “Tơ’lêi hlâu cho ki má môi, ki hmâ ăm hlo má môi cho túa pêi cheăng Hồ Chí Minh. Plâ rơxông Pôa lối 60 hơnăm pêi cheăng kăch măng to lâi tơdroăng cheăng hngăm hngo pá puât xuân ối a pêng kơxah Pôa la Pôa ôh tá pơkrip, achê, têm rơpiât pá ‘nâi tối to lâi, môi plâ hmân ếo kaki hiăng tơklo mơngiơk, sap ing apoăng ta troh drêng prôk xuân sâp hmân ếo kaki ki hiăng tơklo mơngiơk  tiah mê, truâ to yep kơxu sap ing nah oh tá pơ’lêh.

Mâu tơmeăm tĭng dêi tơdroăng ton nah gá mơhno a  um méa túa pêi cheăng rêh ối dêi  Pôa Hồ Chí Minh - Kăn xiâm hnê ngăn tơnêi têa ki apoăng, cho môi ngế ki ôh tá pơkrip mơnhôm rêh ối tơ’lêi hlâu tê”. 

Nôkố, hngêi trá tung Kơpong tíu tơbâ Pôa Hồ Chí Minh - Kăn xiâm hnê ngăn tơnêi têa ki apoăng  a Tíu pêi cheăng dêi Kăn xiâm hnê ngăn tơnêi têa hiăng chiâng “Tíu ki khêi’’, tíu tơkŭm hiâm mơno lĕm hơ-ui pâ dêi kuăn pơlê Việt Nam ƀă mâu ngế ki vâ tơdroăng hơniâp lěm tung lâp plâi tơnêi. Pôa Nguyễn Văn Linh, Kăn xiâm pơkuâ hnê ngăn Đảng tối: Tung pôa hiăng mơhno ivá ki rơdêi ƀă rêh ối tiô troăng rơhlâ kro mơdrŏng ôh tá kâi pơlông tiu, kơtiê xơpá ôh tá kâi pơ’lêh,  ki rơdêi ôh tá kâi pơ’lêh ƀă hiâm tuăn ‘nâi kơhnâ mơ-eăm, ‘nâi kơdĭng, tơdrăng lĕm.

Pôa rêh ối lĕm, ôh tá pơkrip. Tơdroăng rêh ối, tơdroăng tơmiât, tuăn mơno lĕm dêi Pôa rêh ối đi đo tung hiâm mơno dêi kuăn pơlê Việt Nam’’. La Pôa Putin, Kăn xiâm pơkuâ kong têa Rusi tối, Kăn  xiâm dêi tơnêi têa ki apoăng dêi  chal 21 troh lăm pôu ngăn tíu ối dêi Hồ Chí Minh hiăng chêh xo: “Á tối khât drêng châ ‘nâi tơdroăng rêh ối dêi ngế Thái ki rơkê  dêi kuăn pơlê Việt Nam. Môi ngế inâi hiăng chôu ôu eăng tung lâp plâi tơnêi.