VOV4.Xơ Đăng - Tung péa hâi, lơ 25 – 26/8, a pơlê kong kơdrâm Ƀuôn Ma Thuột, kong pơlê Dak Lak, Hô̆i đong hdroâng kuăn ngo Kuô̆k hô̆i hneăng má XV tơkŭm po roh hôp tâi tâng roh má 4 vâ pêi pro mâu tơdroăng xiâm kum ăm hneăng hôp roh má 4, Kuô̆k hô̆i hneăng má XV ƀă séa ngăn tơpui tơno mâu tơdroăng xiâm tơdjâk troh Tơdroăng pơkâ pêi tơnêi têa mơnhông mơdêk cheăng kâ - rêh ối pơlê pơla kơpong vâi krâ hdroâng kuăn ngo kơpong kong ngo hneăng hơnăm 2021 – 2030, tơdroăng tơkêa bro pơ’lêh nếo, mơdêk tơdroăng ki dâi lĕm, châ tơƀrê dêi Hô̆i đong hdroâng kuăn ngo, tơpui tơno ‘na séa mơnhên ngăn Tơdroăng tơkêa bro Luât tơnêi tơníu (‘mâi rơnêu).

Hô̆i đong hdroâng kuăn ngo Kuô̆k hô̆i hneăng má XV hôp tâi tâng roh má 4

Xông tơpui pơxiâm po roh hôp, pôa Y Thanh Hà Niê Kdăm, kăn hnê ngăn Hô̆i đong hdroâng kuăn ngo Kuô̆k hô̆i pơkâ thế mâu kăn teăng mâ tơkŭm tơpui tơno, mơnhên mâu tơdroăng châ tơƀrê, mơnhên xiâm kối ki ối pro pá. Ing mê, pơkâ mâu troăng pêi pro tro tâ nếo mâu hnoăng cheăng pơkâ mơ’no. Tung mê, ki rơhêng vâ tối tơmâng troh mâu tơdroăng pơkâ tơnêi têa mơnhông mơdêk cheăng kâ – rêh ối pơlê pơla kơpong vâi krâ hdroâng kuăn ngo – kong ngo.

A Sa Ly tơplôu ƀă tơbleăng