Ki khât châ mâu kăn tối nhên cho tơdroăng pêi tâk hơnăm 2025 dêi Dak Lak bú châ 6,68%, iâ tâ kơlo pơkâ. Tung pơla mê, pơkâ tâk sap 10% tơngi klêng tung hơnăm 2026 tiô troăng hơlâ dêi Tíu xiâm tơnêi têa ƀă Pơkâ Hôp kân Đảng ƀô̆ kong pơlê, cho pơklât thế hên. Tiô pôa Trần Văn Tân, Ngế râng ngăn liăn ngân kong pơlê Dak Lak tối vâ pêi tro pơkâ mê, kong pơlê thế pơkâ troăng pêi ki vâ châ tâk hên tung pêi cheăng ƀă kơmăi kơmok, mơjiâng ƀă tê mơdró, ngăn ‘no liăn mơjiâng pro ƀă liăn ing kong têa ê pa kong liăn ngân cho péa tơdroăng ki kal.

TĐ: “ ‘Na kơpong hngêi kơmăi mơjiâng pro, pơtối cho xiâm vâ mơdêk châ tâk ƀă kơlo tâk ai 18,14%. Kơpong ‘no liăn pro tơmeăm khoăng xuân thế tơkŭm tăng liăn ngân 100% kơxô̆ liăn ‘no pêi cheăng tiô pơkâ, tiô tối hdrối kơxô̆ liăn mê dâng lối 14.000 rơtal liăn. Pakĭng mê, xuân mơdoh xúa mâu kơxô̆ liăn dêi mâu tơdroăng tơkêa bro ki Tíu xiâm tơbleăng ăm pêi tung kong pơlê. Ƀă mâu kơxô̆ liăn ‘no pêi cheăng pa kong liăn ngân, xuân thế tơkŭm tah mâu tơdroăng pá, tơvâ tơvân, malối tung tơdroăng pro hlá mơ-éa ‘no liăn cheăng vâ mâu tơdroăng tơkêa bro mê châ tơbleăng”.