Hâi lơ 23/12, a Đà Lạt, Vi ƀan kong pơlê Lâm Đồng tơkŭm po Hneăng hôp mơgêi Tơdroăng Tơnêi têa ‘na thăm tơrŭm ƀă mơhnhôk tŏng gum kơxô̆ liăn Chin phuh kong têa ê hneăng hơnăm 2019 – 2025. Tung pơla kố nah, kong pơlê Lâm Đồng tơdah 133 tơdroăng pêi, tơdroăng tơkêa bro, tơdroăng tơkêa pa kong tơdroăng tơkêa bro ing mâu khu pêi cheăng pa kong Chin phuh kong têa ê tŏng gum tâi tâng ki kơnâ tŏng gum lối 18 rơtuh 250 rơpâu dollars.

Mơnhên dêi Vi ƀan kong pơlê Lâm Đồng, ăm hlo, mâu tơdroăng pêi, tơdroăng tơkêa bro, tơdroăng pa kong tơdroăng tơkêa bro ing mâu khu pêi cheăng pa kong Chin phuh kong têa ê hiăng veăng gum mơnhông cheăng kâ – rêh ối pơlê pơla xuân môi tiah tơniăn tơdroăng rêh ối pơlê pơla, xăm kơklêa, kơdroh kơtiê, rak ngăn ivá, hnê hriâm, mơdêk ivá pêi cheăng, hlê plĕng dêi kuăn pơlê kơpong tơdroăng tơkêa bro, gum pơhlêh tơdroăng rêh ối kuăn pơlê, ki rơhêng vâ tối cho kơpong kuăn pơlê hdroâng kuăn ngo, kơpong cheăng kâ ối trâm hên pá puât.

A roh hôp, kong pơlê Lâm Đồng hiăng tối ‘na tơdroăng kơjo tung mơhnhôk kơxô̆ liăn tŏng gum. Pơtối mê, mâu kơvâ kơjo má môi dêi kong pơlê cho khăm pơlât, pêi chiâk deăng, hnê hriâm, mâu tơdroăng rêh ối pơlê pơla.... Kong pơlê dế mơjiâng inâi mâu tơdroăng tơkêa bro kơbông krếo tŏng gum hneăng hơnăm 2026 – 2030 rơtế ƀă pơkâ pơkuâ ƀă xúa tŏng gum pa kong Chin phuh kong têa ê; Pro tơ’lêi hlâu ‘na pơkâ, troăng hơlâ vâ mơhnhôk mâu khu pêi cheăng pa kong Chin phuh kong têa ê mot pêi cheăng, pêi pro mâu tơdroăng tơkêa bro a kong pơlê ing pêi tiô luât Việt Nam ƀă pơkâ dêi kong pơlê.