Tâi tâng roh tơmối châ 5,2 rơtuh roh, tâk châ 1,5 xôh tâng pơchông ƀă roh kố hơnăm hdrối. Tung mê, tơmối lâp plâi tơnêi vâ chê 100.000 roh, tâk châ 3 xôh. Pêi lo liăn ôm hyô châ 3.700 rơtal liăn, tâk 2,5 xôh tâng pơchông ƀă hơnăm 2024. Hên tíu troh tung kong pơlê pơtối mơhnhôk tơmối troh kơdrâm. Ki má môi cho kơpong Ôm hyô Măng Deang, mâu pơlê ôm hyô pơlê pơla kơpong peăng mâ hâi Luô ƀă mâu tíu ôm hyô têa kơxĭ, rơlố peăng mâ hâi Lo mê cho Lý Sơn, Sa Huỳnh, Mỹ Khê.

Tơdroăng ki tơtêk rơdêi dêi ôm hyô Quảng Ngãi troh ing tơdroăng po rơdâ tíu klêi kơ’nâi rah xo bro lế lĕm tro, gum tơdjêp châ tơƀrê tâ pơla kơpong têa kơxĭ peăng mâ hâi Lo ƀă kơpong sinh thái, pơlê pơla peăng mâ hâi Luô, mơjiâng chiâng mâu tíu troh ôm hyô ki hên tơmeăm lĕm mơnâ mâ ngăn, tơ’nôm dêi pó.

Ki rơhêng vâ tối, kuăn pơlê hiăng veăng tơdrêng pơtroh tơdroăng mơdró, rak kơchâi kâ, leh tơbleăng ƀă tơdroăng cheăng tiô khôi vâi krâ nah, rế gum rak vế khôi túa lĕm tro, rế mơdêk pêi lo liăn, tơniăn tơdroăng rêh ối.