Môi măng tĭng hdrối hâi Tĭng kân Noel, pơla mê ai kong mêi ki râ, tung plông hngêi khôp Mằng Lăng, kuăn pơlê rơtế dêi rơpó kơpuih văng, rơnuâ pro tíu ‘măn Yesu Nge, loăng hngó Noel ƀă mâu kế tơmeăm pro ki lĕm. Pôa Nguyễn Thành Toán, kuăn pơlê thôn Ngân Sơn tối ăm ngin ‘nâi:

“Hơnăm kố pro ôh tá tŭm môi tiah rêm hơnăm hdrối mê hía nah, xua kế tơmeăm tro tơ’nhiê hên, mê tơdroăng pro rơnuâ tung hngêi khôp xuân pro krâ kơvâ. Xuân môi tiah loăng hngó Noel, on kơđĕng, mê nếo um Yesu Nge, nôu Maria, pâ roăng Yuse. A hngêi mê á xuân rơnuâ pro tíu ‘măn Yesu Nge ki kŭn a ngiâ hngêi”.

Ƀă hên rơpŏng, athế kal ai hâi khế iâ nếo chiâng vâ ‘mâi mơnhông klêi mâu kế tơmeăm ki tro tơ’nhiê xua ai khía mơhot têa kân lân lu, la troh hâi tĭng kân Noel kố, mâu rơpŏng hiăng rêh ối tơniăn. Pôa Nguyễn Văn Sen, ối a thôn Hội Tín ai tối, rơpŏng pôa tro têa mơhiu tâi tâng mâu tơmeăm, í peâp, prá alâi, kơchâi pôm. La ing tuăn loi Pâ Xeăng mê nhŏng o tŏng gum, mâu kăn thôn xuân hơ-ui gum, kăn pơkuâ veăng gum, Tĭng kân Noel kố xuân ối hlo tơtôu.

“Méluâ tiah mê, la Măng Tĭng kân Noel kố ối tơtôu, ai hiâm mơno hơ-ui gum ƀă hiâm mơno ‘na mơjo pâ dêi pó, tơngah Pâ Xeăng pring vế ăm pơlê pơla, ai tơdroăng tŏng gum kân. Rơhêng vâ tâi tâng rêm ngế thăm rế pâ nhuô̆m dêi rơpó vâ kâi tơkâ luâ mâu tơdroăng ki xơpá”.

Rơtế tơdjuôm hiâm mơno trối mê, ngoh Phan Văn Truyền, ối thôn Hội Tín, ăm ‘nâi, rơkong khôp pâ kân má môi dêi ngoh ƀă kuăn pơlê hơnăm kố cho tơdroăng ki tơniăn lĕm, hơniâp lĕm. Klêi kơ’nâi ai mâu tơdroăng ki ôh tá tơniăn xua kong mê khía mơhot pro, bô bố xuân khôp pâ kơ Pâ Xeăng pói vâ vâ rêm ngế châ rĕng vêh rêh kâ ối tơniăn, tơdroăng rêh ối trối ahdrối nah nếo”.

"Têa kân lân lu tơdjâk hên troh cheăng kâ, hiâm mơno. Măng  Tĭng kân Noel kố mơni rêm ngế kô khôp hên ‘na tơdroăng ki châ hơniâp lĕm, kơ’nâi mê cho rơkâu rêm ngế rĕng vêh tơniăn ƀă tơdroăng rêh ối tiah hmâ”.

Tiô Ƀok xối Phêrô Võ Thanh Nhàn, ƀok pơkuâ hngêi khôp Mằng Lăng, tâi tâng kuăn pơlê tung Tơring Khôp ai 527 rơpŏng dâng 1.560 ngế kuăn pơlê tiô khôp, cho a mâu cheăm Tuy An Đông, Tuy An Bắc ƀă môi iâ cho a Tuy An Tây. Rôh kong mêi têa kân kố nah pro tâi tâng mâu rơpŏng pơrá tro hía ‘na kế tơmeăm. Xua mê, Tĭng kân Noel hơnăm kố mâu rơpŏng rơnuâ bu iâ tê, tơkŭm tŏng gum dêi rơpó tơkâ luâ xơpá. Tơring Khôp tơmâng ngăn tơdjêp mâu khu ki ai tuăn mơno hơ-ui gum kuăn pơlê rĕng tơniăn rêh ối.

“Tĭng kân Noel hơnăm kố cho tĭng kân ki ngin rơhêng vâ mơhno tối hiâm mơno dêi tơná maluâ ngin trâm hên xơpá xua kong mê khía mơhot têa lân lu, la vâi krâ-nhŏng o môi hiâm mơno mơ-eăm tơkuâ luâ mâu tơdroăng xơpá pơloăng mơná. Ing hiâm mơno loi mê ngin hlo tiah kố, mâu tơdroăng pơloăng mơnúa pơrá ai hâi khế, tâng pin ai môi tơdroăng loi khât mê kô tơkâ luâ mâu tơdroăng pá pơloăng tung tơdroăng rêh ối”.

Idrâp kơ’lêng hngêi khôp Mằng Lăng chuât tung tơdroăng ki pơlê cheăm Dak Lak pơla kố nah trâm kong mêi têa kân lân lu. Tĭng kân Noel a Mằng Lăng hơnăm kố ôh tá eăng bâ hên ƀă mâu pul on, mâu mơngiơk, kuăn mơngế ôh tá kơdrâm môi tiah rêm hơnăm, la pêng păm ‘na tuăn loi. Mê cho Măng Tĭng kân Noel dêi tơdroăng kơdĭng, dêi hiâm mơno pâ nhuô̆m dêi pó, dêi tơdroăng châ têk on séa bâ tung pơla xơpá, vâ ing mê, kuăn pơlê rơtế dêi rơpó ‘mâi mơnhông, tơmiât troh tơdroăng rêh ối tơniăn lĕm tâ a la ngiâ.