Kơmăng tơkŭm idrâp Chêng koăng Đông Nam Á hơnăm 2025 ai 3 khu kong têa ê ƀă 5 khu ngê̆ nhân tung tơnêi têa veăng mơđah mê cho: Lếo, Kul, Malaysia; mâu kong pơlê: Lâm Đồng, Dak Lak, Gia Lai, Quảng Ngãi ƀă Phú Thọ. Tơbleăng a rôh leh, pôa  Đinh Văn Tuấn, Phŏ hnê ngăn Vi ƀan Kuăn pơlê kong pơlê Lâm Đồng tối ki kơnía tơƀrê, ki rơdêi tơbleăng lâp lu ƀă ivá vâ tơdjêp hiâm mơno tuăn lo ing mâu idrâp dêi chêng koăng.

Kơmăng tơkŭm idrâp Chêng koăng Đông Nam Á hơnăm 2025 ôh ti xê to môi tơdroăng vâ pơ-eăng tơmeăm khoăng kơnía ton nah, mê ối cho tíu tơkŭm dêi trơdroăng hriăn plĕng ki nếo, tơdjêp ƀă kuăn pơlê, púi vâ mơ-eăm mơnhông khôi túa, vêa vong lĕm tro Việt Nam tung tơdroăng ki lĕm dêi kơpong ƀă lâp plâi tơnêi:

“Tung pơla hên hơnăm hdrối chêng koăng ôh  ti xê to tơdrá, mê ối cho mơhúa, cho rơkong tơpui dêi mơngế Tây Nguyên ƀă kong ngo. Rêm rơrêk chêng cho môi tơdroăng hơ’muăn, rêm tơdrá cho môi hiâm mơno vâ mơhno túa lĕm tro, môi tơdroăng ki tơdjêp ing ton nah, nôkố ƀă tung la ngiâ. Kơmăng tơkŭm idrâp Chêng koăng Đông Nam Á hơnăm 2025 cho rôh vâ idrâp chêng chuât xơtó luâ tơkăng kong tơdjêp ƀă vâi pú tung kơpong pro chiâng tơkŭm mâu idrâp tơdjuôm hên khôi túa, vêa vong lĕm tro ƀă thăm tơrŭm môi tuăn dêi rơpó ‘’.

Túa pêi pro krâ pơlê pro xối xeăng a kơmăng po mơdĭng pơtroh ăm xeăng ‘nâi tơdroăng rơkâu pâ púi vâ ăm pơlê pơla hơniâp lĕm, báu prá alâi xông mo dâi vâ tơdroăng pro mơdĭng dêi pơlê kô tơniăn tro tiô tuăn vâ hơniâp ro. A plông hơdruê xuăng tơbâ tơdroăng pêi pro dêi pơlê tiô ton nah ƀă ai drôu xiâm, hơpiâp on tĭng koh ƀlô ƀlông... mâu khu tŏn chêng koăng mơđah hmâng idrâp dêi kong ngo, mơhno ki tơrŭm, ki phiu ro ƀă tơdroăng rêh ối tơrŭm krá kak.

Kơmăng  leh  mê cho rôh mâu ngê̆ nhân kong pơlê Lâm Đồng trâm mâ hriâm tâp, tơpui tơno ƀă dêi rơpó hriâm ing dêi rơpó hlối tơbleăng um méa túa lĕm tro, kuăn mơngế Lâm Đồng ƀă mâu hdroâng kuăn ngo, tơmối tung tơnêi têa ƀă lâp plâi tơnêi. Nâ Ka Duýp, Khu ngê̆ nhân kuăn ngo K’Ho, cheăm Đinh Trang Thượng, kong pơlê Lâm Đồng ăm ‘nâi:

“Ngin lo ing Kâu lăk ƀô̆  tŏn chêng ƀă lối 40 ngế ƀă môi tuăn vâ xah hêi ro hlối tơrŭm, vâ hriâm ing mâu vâi pú, vâ tăng hlo túa vêa vong lĕm ro ki tơviah dêi hdroâng kuăn ngo ki ê. A kô hâk tơngăm tâ khôi túa, vêa vong lĕm tro tŏn chêng koăn dêi kong pơlê tơná. Sap mâu tơdroăng hriâm ing mâu vâi pú mơhno ăm mâu túa xuăng ki nếo dêi khu tŏn chêng tơná”.

Kơmăng tơkŭm idrâp Chêng koăng Đông Nam Á hơnăm 2025, Tíu xiâm ngăn Khu kih luk tơnêi têa Việt Nam - Tơkŭm po Kih luk Việt Nam hiăng diâp Pơkâ mơnhên 2 Kih luk Việt Nam troh  Vi ƀan Kuăn pơlê kong pơlê Lâm Đồng mê cho: Kih luk “ Mơđah tŏn chêng koăng tơkŭm mơhno túa lĕm tro tŏn chêng hơdruê xuăng ki kân má môi” ƀă Kih luk “Tơdroăng mơđah a plông hlối kơŭm tŏn chêng kơhnhon xuăng tơdjêp ƀă kuăn pơlê, tơkŭm to mâu ngê̆ nhân, ngê̆ sih - mâu diê̆n viên ƀă kuăn pơlê rơtế veăng mơđah krâm má môi  ƀă ƀai We are LamDong”.

Rôh kố, a Đà Lạt, Lâm Đồng ối mơđah hên tơdroăng ki hơniâp, mê cho: Tơdroăng mơđah xâp ếo pơtak teăn dêi kuăn ngo, Leh tơbleăng Kơphế lâp plâi tơnêi 2025 ƀă hên tơdroăng mơđah ki ê, châ hlo, hôp tơpui tơno tơdroăng kal, tơdroăng túa lĕm tro - Ôm hyô tơ’mot hên ngế mot ngăn, malối cho kơmăng mơđah hơdruê xuăng ƀă Countdown koh hơnăm nếo.

Mâu tơdroăng po leh ôh ti xê to vâ pơ-eăng tơmeăm khoăng lĕm tro ton nah, tơbleăng um méa cheăm bêng kong pơlê  mê ối pro hâi leh mơdĭng hơniâp ro kơdrâm kơdrĕng, tơ’mot hên kuăn pơlê ƀă tơmối vâ troh a Đà Lạt tung mâu hâi mơ’nui hơnăm.