Kơ’nâi pái hâi mơđah hơniâp ro, rôh mơđah mê tơ’mot lối 800 ngế ngê̆ nhân, diê̆n viên kuăn pơlê veăng  lo ing 26 to cheăm, bêng tung kong pơlê Dak Lak, teăng mâ 9 hdroâng kuăn ngo, mê cho: Rơđế, M’Nông, Jarai, Bơhnéa, Rơteăng, Bru Vân Kiều, Mường, Tày, Nùng. Mâu khu kăn hiăng veăng mơđah a 5 tơdroăng, trối: mơđah tŏn chêng, rêi prôa, tiô chêng koăng ton nah, hơdruê tơdrá kuăn ngo, hơdruê chal nếo, rơngêi, ƀă pơtối  tơbâ pro mơdĭng tiô túa tơlá ton nah dêi mâu hdroâng kuăn ngo châ pơtối tơbâ, môi tiah: Mơdĭng to hngêi nếo, mơdĭng pơxá inâi, mơdĭng hâk ro hiăng xông kân, mơdĭng ju kâng, mơdĭng xối ăm pơlê ƀă hên tơdroăng pro mơdĭng ki ê. Rơtế ƀă chât ƀai tŏn chêng, rêi prôa, hơdruê, rơngê ting ting châ mâu khu mơđah hriăn pro, ngăn ro.

          Mơgêi tơdroăng tơ’noăng túa lĕm tro, Khu tơkŭm po hiăng  diâp 8 to pri ăm tâi tâng khu mâu tíu ki hiăng mơđah tro túa, khĕn kơdeăn 37 ƀai mơđah ki hơniâp ro. Khu mơđah dêi cheăm Liên Sơn, Lak châ ối má môi tung tâi tâng khu ki mơđah.