VOV4.Xơ Đăng - Hâi lơ 14/7, hneăng hôp má pŭn Hô̆i đong kuăn pơlê kong pơlê Dak Lak hneăng má X tơpui tơno hên tơdroăng ki kal tơdjâk troh mâu troăng pêi pro mâu pơkâ pêi, hnoăng cheăng mơnhông mơdêk cheăng kâ – rêh ối pơlê pơla, tơniăn cheăng lêng – gâk kring 6 khế mơ’nui hơnăm, mâu tơdroăng tơdjâk troh tơdroăng rêh ối dêi kuăn pơlê.

Ing tơpui tơno, mâu kăn teăng mâ môi tuăn ƀă mơ-éa tơbleăng tơdroăng pêi pro hnoăng cheăng 6 khế apoăng hơnăm, tơdrêng amê pơkâ thế mâu kơ koan kal thăm pêi pro pơ’lêh pro hlá mơ-éa ƀă mơhnhôk mơ’no liăn cheăng; tơmâng mơ’no liăn cheăng, mơjiâng pro hngêi trăng, troăng klông tơdâng tơ’mô, tiô rơxông nếo...

Pôa Trần Hồng Tiến, Kăn teăng mâ xông tơpui a hneăng hôp má 4 Hô̆i đong kuăn pơlê kong pơlê Dak Lak

’Na kơvâ pêi chiâk deăng, mâu kăn teăng mâ pơkâ thế Vi ƀan kong pơlê ƀă mâu kơvâ cheăng ai troăng tê ngi kong têa ê plâi sầu riêng. Ƀă ƀăng deăng dâng 12.000 hectar plâi sầu riêng, pêi lo rêm hơnăm lối 125 rơpâu tâ̆n, Dak Lak kal thăm pêi pro tơdroăng tê ngi kong têa ê.

A Sa Ly tơplôu ƀă tơbleăng