VOV4. Xơ Đăng - Kơxo lơ 11/10, Hô̆i đong Pơlê kong kân Hồ Chí Minh hneăng má  X tơkŭm po hneăng hôp roh má 7 (hneăng hôp tơdroăng pêi cheăng) vâ séa ngăn, pơkâ mâu tơdroăng xiâm ối tung hnoăng chiâng pêi, ai tơdroăng ki thâ, kal vâ pêi pro tơtro hnoăng cheăng mơnhông mơdêk cheăng kâ – rêh ối pơlê pơla hơnăm 2022 ƀă mâu hơnăm pơtối mê. 

Pôa Bùi Xuân Cường, Kăn phŏ hnê ngăn Vi ƀan pơlê kong kân Hồ Chí Minh ki nếo

A hneăng hôp kố, Hô̆i đong Pơlê kong kân Hồ Chí Minh tơpui tối, tơno vâ séa ngăn tơbleăng ămpêi pro 13 tơdroăng tơkêa bro pơkâ, môi tiah: Troăng hơlâ ki phá tơ-ê tŏng kum hnoăng liăn hriâm ăm vâi hdrêng mâmnon, hok tro; pơkâ kơlo hnoăng liăn hriâm hơnăm 2022 – 2023 ƀă mâu hơnăm pơtối tung pơlê kong kân; troăng hơlâ mơ’no liăn cheăng, pơkâ pơ’lêh troăng hơlâ mơ’no liăn mâu tơdroăngtơkêa bro mơ’no liăn cheăngtơnêi têa; pơ’lêh Pơkâ pêi mơ’no liăn cheăng iâ khế hneăng hơnăm 2021 – 2025 ƀă hơnăm 2022; ‘mâi pơ’lêh tơdroăng tối hdrối mơ’no liăn cheăng tơnêi têa hơnăm 2022.

Xuân a hneăng hôp kố, mâu kăn teăng mâ Hô̆i đong Pơlê kong kân Hồ Chí Minh hiăng rah xo pôa Bùi Xuân Cường, Kăn pơkuâ Troăng rơxế lơtreng Pơlê kong kân Hồ Chí Minh pro Kăn phŏ hnê ngăn Vi ƀan pơlê kong kân, hneăng hơnăm 2021 – 2026.

VOV Tây Nguyên/Tơplôu: A Sa Ly