Tơpui a leh tơbâ, pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa tối nhên, vâ pơkuâ tơnêi têa mơnhông mơdêk, Đảng thế ôh tá la lâi pơtê hơ'lêh nếo troăng tơmiât, mơnhông tơdroăng tơpui leăng. Luâ 30 hơnăm, Hô̆i đong Tơpui leăng Xiâm tơnêi têa hiăng tối hnoăng ki xiâm hnê tối troăng pêi pro ‘na tơpui tơdroăng kal kí; tơkŭm mâu kăn ki rơkê pơkuâ, rak ngăn, khu cheăng khoa hok, kăn ƀô̆ đảng viên ƀă kuăn pơlê.

Tơnêi têa dế tơbleăng Pơkâ Hneăng hôp mâu kăn tung lâp tơnêi têa roh má 16 dêi Đảng, mơ-eăm pêi pro mâu pơkâ mơnhông tơnêi têa troh hơnăm 2030 ƀă hơnăm 2045 ƀă 100 hơnăm pơtối. Pơkâ thế mơdêk rĕng, krá tơniăn; mơdêk ivá pơkuâ xêh, rak tơniăn tơdâng tơ'mô, tơdâng pơlê pơla ƀă tơdroăng rêh ối Kuăn pơlê.

Pôa Tô Lâm, Kăn xiâm pơkuâ hnê ngăn Đảng, Kăn xiâm hnê ngăn tơnêi têa pơkâ thế Hô̆i đong pơtối mơnhên ƀă mơdêk hnoăng cheăng xiâm, ki kal tung hriăn plĕng tơdroăng kal kí, mơgêi tơdroăng ki ai khât ƀă hnê mơhno troăng pêi ton xŏn dêi Đảng, hbrâ rơnáu tối tơbleăng ƀă châ hlo mâu tơdroăng ki nếo. Hô̆i đong tơmâng tí tăng 'nâi plĕng mâu tơdroăng tơpui leăng ki xiâm ƀă mâu tơdroăng ki nếo, ki kal tơdrêng dêi tơnêi têa, dêi rơxông.

Tơdrêng amê hlối pêi pro trâu hơngế tơdroăng tơmiât pơkuâ troăng hơlâ, pơhlêh nếo pơkuâ tơnêi têa; pêi pro tơtro tơdroăng tơrŭm pơla Tơnêi têa, kơchơ mơdró ƀă pơlê pơla; mơdêk ki rơkê, châ tơƀrê xúa kơxô̆ liăn.