VOV4.Xơ Đăng - Kơxo lơ 29/8, lối 450 rơpâu ngế hok tro dêi kong pơlê Dak Lak hiăng mot hơnăm hriâm nếo 2022 – 2023. Hâi ro, sôk suâ xuân ai tô tuăn há, rơrêk tung hiâm mơno hâi apoăng vêh tơkŭm a hngêi trung klêi kơ’nâi hneăng pơtê ton hâi cho tơdroăng ki rơrêk tơdjuôm dêi hok tro, nôu pâ hok tro ƀă thái cô. Hơnăm hriâm 2022 – 2023, lâp kong pơlê Dak Lak ai lối 450 rơpâu ngế hok tro sap ing râ mâm non troh râ trung hok phôh thong.

Hok tro hngêi trung râ má môi Võ Thị Sáu tung hâi apoăng vêh tơkŭm a hngêi trung

Vâ tơdroăng phiu ro, sôk suâ ăm vâi hdrêng tung mâu hâi apoăng tơkŭm a hngêi trung, Khu pơkuâ Hnê hriâm ƀă Hnê mơjiâng tuăn ngôa rơkê hiăng hnê mơhno mâu hngêi trung tiô ivá dêi tơná tơkŭm po mâu tơdroăng pêi phiu ro, tơniăn, tơtro ƀă hơnăm hok tro, khôi túa lĕm tro dêi hdroâng mơngế vâ koh tơdah mâu vâi o, ki má lối cho hok tro pơxiâm mot râ apoăng. Ing mê, kum mâu vâi o ôh tá tô tuăn, loi tơngah drêng mot tung tơdroăng hơnăm hriâm nếo.

A Sa Ly tơplôu ƀă tơbleăng