Mâu hâi dêi khế 4 ki kơnía roh nah, prôk drô tíu xiâm dêi cheăm Quảng Trực, tơring Tuy Đức, kong pơlê Dak Nông tung pơla ai hên hĕng hlá cơ eăng tơdah khêi, hơlŏng trĭng. Tung tuăn chôu vế dêi mâu rơxông vâi krâ hdrối, mâu kăn ƀô̆ hơnăm hiăng krâ kăch măng, phoih chôu vế mâu hâi ki veăng lăm plâ xâ klêi mê troh a hâi châ tơleăng lĕm Peăng Hdroh, pro tơnêi têa tơrŭm chiâng môi xuân u ối tung hiâm tuăn ƀă hên hĕng tơdroăng ki hâk tơngăm, hâk phiu.

Pôa Điểu Đi, krâ pơlê Bu Păng 2, cho Kăn hnê ngăn Vi ƀan cheăm Quảng Trực hneăng hdrối nah ối chôu vế, ing mâu hơnăm 1965 ta troh a hâi châ tơleăng lĕm kong pơlê Dak Nông, kơpong tíu tơkăng kong dêi cheăm Quảng Trực ta troh a Bình Phước tro khu lêng Mih ƀă Việt Nam Kŏng hoa kơ’nêh ƀom pro tơ’nhê tơ’nhĕng hên ó. La ƀă hiâm tuăn khên tơnôu, ôh tá la lâi xâu, mê kuăn pơlê xuân ối rak vế dêi tơnêi, rak vế dêi pơlê, hên vâi rơtăm, khu hơnăm ối nếo a mâu pơlê cheăm lăm prôk tiô kăch măng:

“Pơlê Bu Păng kố cho tơnêi dêi nôu pâ-jâ pôa sap ing chal vâi krâ roh ton nah. Tung pơla tơplâ nah, Mih - Ngŭi hiăng pơklât thế vâi krâ châ ing pơlê xiâm, la vâi krâ-nhŏng o pin hlâ rêh xuân ối dêi a pơlê xiâm. Tung pơla tơplâ nah, mê rơtế ƀă kăch măng tơplâ kring vế kơpong tơnêi tíu ki kố, pro tơleăng lĕm klêi mê, tơkŭm pêi cheăng kâ, mơjiâng pơlê cheăm. Nôkố Quảng Trực hiăng mơnhông tơtêk hên ‘nâng, tơdroăng rêh ối hiăng châ tơtêk hên, xuân kơnôm ai Đảng, Tơnêi têa tŏng kum, mơ’no liăn mơjiâng pro ăm kuăn pơlê”.

Ƀă hnoăng cheăng ki khên tơnôu, ô eăng, kâi chân ƀă hnoăng cheăng tơplâ dêi kăch măng, hơnăm 2019, cheăm Quảng Trực hiăng châ Ngế pro xiâm hnê ngăn Chin phuh vêh mơnhên tối cho cheăm An toàn Khu ƀă tơdah xo Ƀâng mơnhên tối tơmeăm khoăng ki kơnía dêi kong pơlê.

Xuân sap ing chôu phut kố, cheăm Quảng Trực hiăng châ kong pơlê Dak Nông tŏng kum ngăn khât, mơ’no hên liăn ngân, kuăn mơngế, kế tơmeăm vâ pơtroh kum ăm kuăn pơlê kơdroh kơklêa, xăm kơtiê bă mơnhông pro kro mơdrŏng. Tâng ối a kơdrum deăng loăng mắc ca ki kân rơdâ 2 ha ki pêt tơvât ƀă kơphế, jâ Thị Nớ, môi ngế kăn ƀô̆ a cheăm Quanrg Trực tối ăm ‘nâi, kơtăn kố dâng 10 hơnăm, loăng mắc  ca hiăng châ kuăn pơlê a kơpong kố pêt mơjiâng hên.

Ƀă hiâm tuăn mơ-eăm pêi hnoăng cheăng, kăn ƀô̆, đảng viên djâ troăng ahdrối, kuăn pơlê prôk tiô mơ’nui, jâ Nớ cho ngế ki djâ troăng ahdrối pêt loăng plâ mắc ca, klêi mê, mơhnhôk vâi krâ-nhŏng o pêi pro ƀối. Rêm ha drêng châ tê mơdró kâ pêi châ sap ing 300 troh 500 rơtuh liăn 1 hơnăm.

“Á hâk tơngăm ‘nâng drêng kot mâ, xông kân a pơlê xiâm, klêi mê châ lăm hriâm, châ pêi cheăng nôkố prếo vêh dêi a kơpong pơlê kăch măng Quảng Trực kố vâ pleăng hnoăng cheăng. Kơnôm ai tơdroăng tŏng kum dêi Đảng, Tơnêi têa, rơtế ƀă tơdroăng mơ’no liăn mơjiâng pro hngêi trăng, troăng klông, vâi krâ-nhŏng o a pơlê cheăm kố xuân hiăng châ hriâm khoa hok kih thuât, châ hnê mơhno tối, tŏng kum pêi pêt hdrê loăng, mơnăn păn.

Hên rơpŏng hngêi hiăng tơkâ luâ tơdroăng pá puât, kơdroh kơklêa, xăm kơtiê, pro kro mơdrŏng ki tơxâng păng ‘nâng”.

Pôa Nguyễn Hải Lý, Kăn hnê ngăn Vi ƀan cheăm Quảng Trực, tơring Tuy Đức, kong pơlê Dak Nông tối ăm ‘nâi, lâp cheăm dế kố ai vâ chê 3 rơpâu rơpŏng kuăn pơlê, lối 10 rơpâu pơ’leăng mâ mơngế, kơxô̆ kuăn pơlê cho hdroâng kuăn ngo châ lối 50%. Kơnôm ai tơdroăng tŏng kum ki kơjo kân khât dêi tơnêi têa ƀă tơdroăng ki hơ’lêh nếo rĕng tiah dế nôkố tung tuăn mơno ki hloh hlê rơkê plĕng dêi kuăn pơlê, mê kơxô̆ rơpŏng kuăn pơlê ki kơtiê hiăng chu kơdroh hên, ing 69% apoăng hơnăm 2022 dế nôkố hiăng chu kơdroh ối 49%.

Pôa Nguyễn Hải Lý vêh mơnhên tối, ƀă mâu tơdroăng ki tơ’lêi hlâu ăm mơnhông pêi cheăng kâ, rêh ối pơlê pơla tiah dế nôkố, mơni ôh pá ton xếo, Quảng Trực kô châ hluăn ing “cheăm malối kơtiê xahpá dêi tơring kơtiê 30a”.

“Tung tâi tâng mâu tơdroăng cheăng ki xiâm tung mơ’no liăn cheăng kum ăm kuăn pơlê, mê ngin kơjo kum 2 tơdroăng ki ai tơdjâk dêi kơvâ pêi chiâk pêi deăng, mê cho hdrê loăng pêt, mơnăn păn ƀă khoa hok kih thuât, kum ăm vâi krâ-nhŏng o, hnê kuăn pơlê hlê plĕng túa pêi cheăng kâ.

Vâ pơtối mơdêk hnoăng cheăng, châ xúa liăn ngân, mơngế rơkê dêi tơnêi têa, klêi mê, châ mơdêk hiâm tuăn ki vâ tŏng kum dêi kuăn pơlê, kum ăm tơdroăng rêh ối kuăn pơlê châ mơnhông tâ. Ing mê, kum ăm cheăm tơxâng cho cheăm khên tơnôu tung chal tơplâ nah, klêi mê, pơtối djâ troăng ahdrối tung mơnhông mơjiâng túa pêi pêt, păn mơnăn mơnôa tơtro vâ mơnhông pêi cheăng kâ a chal hơniâp lĕm nôkố”.

Pôa Điểu Thái, Kăn phŏ pơkuâ hnê ngăn Đảng tơring Tuy Đức tối ăm ‘nâi, cheăm An toàn khu Quảng Trực ai hnoăng cheăng kal kân khât tung hneăng tơplâ xâ nah, nốkố xuân pôu râng hnoăng cheăng ki kal tung mơnhông pêi cheăng kâ, rêh ối dêi tơring. Dế nôkố, tơring dế tŏng kum, ngăn khât, mơ’no liăn ngân, tơmeăm khoăng tŏng kum ăm Quảng Trực, rế mơnhông pêi cheăng kâ, rế kring vế, pơtối mơdêk ki kơnía tuá lĕm tro tiô khôi hmâ vâi krâ nah, mơnhông hiâm tuăn pâ nhoăm tơnêi têa:

“A cheăm Quảng Trực vâi krâ kuăn pơlê hiăng ai hên hnoăng cheăng kăch măng. Tung pơla hdrối mê hía nah ƀă la ngiâ ah, tung pơla rak vế, pêi pro 3 tơdroăng cheăng xiâm tơnêi têa, kố châ ngăn cho ivá cheăng ki kal kân khât vâ ngin pơtối mơ’no liăn kum ăm tơring Quảng Trực pơtối mơdêk khôi túa, vêa vong dêi mâu hdroâng kuăn ngo, mơnhông pêi cheăng kâ - rêh ối pơlê pơla”.

Klêi kơ’nâi 48 hơnăm hâi châ tơleăng lĕm peăng Hdroh, pro tơnêi têa tơrŭm chiâng môi, ƀă tơdroăng ki hơ-ui tŏng kum dêi Tơnêi têa ƀă tơdroăng ki kơdo mơ-eăm dêi kuăn pơlê akố, Quảng Trực môi to cheăm tíu tơkăng kong ki malối kơtiê xahpá dế thăm chôa ‘lâng mơnhông mơdêk. Đảng ƀô̆, khu kăn pơkuâ nguăn ƀă kuăn pơlê tung cheăm dế ôh tá pơtê pơtối mơdêk hnoăng cheăng kăch măng, kơdo mơ-eăm chông djâ cheăm An toàn khu kố chiâng cheăm ki djâ troăng ahdrối tung pêi chiâk pêi deăng dêi tơring kơtiê 30a Tuy Đức.