Hâi hôp Chi ƀô̆ tung Đảng 4, Đảng ƀô̆ hngêi trung râ má pái phôh thong Hoàng Hoa Thám, tơring Lệ Thủy, kong pơlê Quảng Bình ai pơxúa khât. Apoăng hâi hôp, mâu đảng viên hơ’muăn mâu tơdroăng ‘na Pôa Hồ. Tung mâu hơnăm hdrối mê hía nah, tung mâu rôh hôp dêi Đảng tiô hâi khế pơkâ, mâu Chi ƀô̆ a Đảng ƀô̆ hngêi trung râ má pái phôh thong Hoàng Hoa Thám hiăng tơbleăng mâu tơdroăng hơ’muăn ‘na Pôa Hồ vâ hriâm, pêi pro tiô Pôa.

Tung mê, bú tối nhên mâu tơdroăng ki ối pá tơvâ tơvân, mâu tơdroăng ki ối hâi pêi tung kăn ƀô̆, đảng viên vâ tơbleăng mâu troăng vâ pêi tơkâ luâ tơdroăng xơpá, ‘mâi rơnêu lơ tối tơbleăng ‘na mơngế ki djâ troăng lĕm ahdrối, mâu ngế ki pêi cheăng kơhnâ hlối ai hiâm mơno lĕm. Cô Nguyễn Thị Thương, Chi ƀô̆ 4, Đảng ƀô̆ hngêi trung râ má pái phôh thong Hoàng Hoa Thám, tơring Lệ Thủy ăm ‘nâi, hdrối mâu hâi vâ tơkŭm hôp, mâu đảng viên hbrâ mâu tơdroăng hơ’muăn ki ai pơxúa ‘na Pôa Hồ hơ’muăn ăm mâu đảng viên tung Chi ƀô̆ hmâng.

Mê cho mâu tơdroăng hơ’muăn ‘na ‘’Têa tô têa hngíu’’, ‘’Chôu phut kal git ‘nâng’’, ‘’Mŏng rơhé klâ xoăng pái’’, ‘’Ếo tơtô’’, ‘’Péa kơpeăng kŏng’’ ƀă hên tơdroăng hơ’muăn ki ê.  Sap ing tối tơbleăng tơdroăng mê, mâu rôh hôp tơpui tơno dêi Chi ƀô̆ hên ngế tơpui, hmâng ro.

“Hdrối mâu rôh vâ hôp Chi ƀô̆, ngin tăng mâu kơxop hlá mơ-éa ki ro, túa hơ’muăn ki ro, tro ‘ló ‘na tơdroăng hriâm tâp ƀă pêi pro tiô troăng tơdjâ, hiâm mơhno ki lĕm, túa cheăng dêi Hồ Chí Minh. Ing mâu tơdroăng hơ’muăn mê ngin bro ƀai hriâm  ăm tơná rêm ngế đảng viên, khu pú hên dêi Chi ƀô̆ ƀă Đảng ƀô̆. Xuân ing mê, rêm ngế xará hriâm xêh bro ƀai hriâm vâ xúa tung rêh ối, tung pơlê pơla ta troh tung tơdroăng pêi cheăng”.

 Đảng ƀô̆ pơlê kân Nông trường Lệ Ninh, tơring Lệ Thủy, kong pơlê Quảng Bình ai vâ chê 500 ngế đảng viên tơkŭm hôp a 12 Chi ƀô̆. Rêm khế, râ ủy tơkŭm po 1 pôe hâi hôp tơpui tơno, rah mâu tơdroăng hơ’muăn ki ‘ló, tro, ai pơxúa ‘na Pôa vâ hơmuăn ăm mâu đảng viên hmâng apoăng mâu rôh hdrối vâ hôp dêi Chi ƀô̆ tiô khế pơkâ hôp.

Pôa Nguyễn Thanh Hải, Kăn hnê ngăn Chi ƀô̆ Tôh Kơphô̆ Liên Cư, pơlê kân Nông trường Lệ Ninh, tơring  Lệ Thủy, kong pơlê Quảng Bình ăm ‘nâi,  ki xiâm dêi Chi ƀô̆ hên đảng viên cho kuăn pơlê pêi chiâk, mơngế pêi chiâk deăng tơdroăng hnê mơhnhôk pêi pro tiô Pơkâ kơxô̆ 05 dêi Khu xiâm Kal kí thế rĕng hlê, pêi ai pơxúa  ƀă kum mâu đảng viên kô châ xúa hlối pêi pro tung rêh ối, pêi cheăng kâ.

Hâi tơkŭm hôp a chê kố, ai mâu đảng viên lăm hôp hrá troh, chiâng tơdjâk hâi hôp dêi Chi ƀô̆. Drêng kố, pôa Nguyễn Thanh Hải, kăn hnê ngăn Chi ƀô̆ hiăng hơ’muăn tơdroăng ‘na Pôa Hồ: “Chôu phut cho kơnía git khât - 10 phut xuân hiăng hrá’’. Klêi hmâng tơdroăng hơ’muăn mê, râ ủy vâ mâu đảng viên séa ngăn dêi tơná, tíu ki lâi tơná pro hâi tro, thế ‘nâi git chôu phut dêi tơná ƀă vâi pú ki ê:

“Đảng viên thế pêi pro tro tơrêm khế, tơrêm 3 khế môi hdroh, tơrêm hơnăm ƀă troh mơ’nui hơnăm tơkŭm pêi ƀă tối ki tơƀrê lơ ôh dêi đảng viên. Vâ pêi tro tơdroăng hơ’muăn ‘na Pôa ƀă vâ tơdroăng pêi pro troh lâp lu pơxúa tung rêh ối, tung kuăn pơlê mê tơdroăng pêi pro apoăng dêi pin tung rêm rôh hôp dêi Chi ƀô̆, rah hên túa tơdroăng ki tro ‘ló hơ’muăn ‘na Pôa, ‘na mâu ngế pêi cheăng kơhnâ rơkê, mâu ngế djâ troăng lĕm ahdrối vâ mâu đảng viên hriâm ƀối, tung mê xuân tơkŭm mơhno nhên mâu tơdroăng ki ‘mêi, ki ôh tá tro tung kăn ƀô̆, đảng viên.

Troăng rơhlâ ngin cho vâ pêi ing mâu tơdroăng ki kŭn má môi, djâ xúa tung rêh ối ƀă tuăn ngôa dêi đảng viên, hlê sap ing mâu tơdroăng ki kŭn ‘nôi hdrối’’.

Đảng ƀô̆ tơring Lệ Thủy, kong pơlê Quảng Bình ai 38 Đảng ƀô̆ ƀă 19 Chi ƀô̆ tung mê ai 11.800 ngế đảng viên. Pêi pro tiô hnê mơhno  kơxô̆ 05 ‘na mơdêk hriâm ƀă pêi pro tiô tuăn mơno ki lĕm tro tiô túa cheăng Hồ Chí Minh, troh nôkố, 100% Chi ƀô̆ Đảng tung tơring tơbleăng pêi tiô tơdroăng hơ’muăn ‘na Pôa, mơhno mơngế ki pêi cheăng kơhnâ, ai tuăn lĕm ‘nâi kơdo mơ-eăm pêi tơdroăng ki lĕm tơbleăng tung rêm rôh hôp Chi ƀô̆.

Pôa Lê Vĩnh Thế, Kăn hnê ngăn Đảng tơring Lệ Thủy, kong pơlê Quảng Bình ăm ‘nâi, hơ’muăn ‘na Pôa Hồ hiăng veăng kum hơ’lêh nếo tơdroăng pêi pro ƀă mơdêk ki tơƀrê tung rêm rôh hôp dêi Chi ƀô̆ a cheăm, tơring, ing mê vâ châ hơ’lêh tung rêm ngế kăn ƀô̆, đảng viên ƀă kuăn pơlê. Mâu tơdroăng hơ’muăn ‘na Pôa châ pơ-eăng troh lâp lu vâ đảng viên, kuăn pơlê hriâm, ‘nâi nhên hnoăng cheăng pêi tơná tung tơdroăng pêi cheăng, ‘na hiâm mơno lĕm ƀă tơdroăng rêh ối:

“Ngin tơbleăng tơdroăng hriâm tâp, pêi pro tiô hiâm mơno lĕm,  tuăn lĕm, túa cheăng dêi Hồ Chí Minh tung mâu Pơkâ dêi Hneăng hôp kân Đảng rêm râ ƀă tơdroăng pêi pro rơtế ƀă tơdroăng cheăng kal kí a pơlê cheăm môi tiah tung tơdroăng: Kơdroh kơklêa xăm kơtiê, gu tơbăng tơnêi, mơjiâng thôn pơlê nếo. Lệ Thủy xuân mơjiâng 5 tơdroăng pêi pro rơtế ƀă hiâm mơno lĕm tro, tuăn lĕm dêi Hồ Chí Minh, djâ  tơbleăng a rêm Đảng ƀô̆, Chi ƀô̆ vâ hnê tơbleăng ăm rêm ngế đảng viên hriâm ƀối.

Đi đo tơkŭm pêi tơdroăng kố ƀă hnoăng cheăng pêi tơbleăng tối ngế ki ối a ko djâ troăng lĕm, ƀă tơdroăng hmâ tối đảng viên thế djâ a hdrối, mê pơlê tơnêi têa tiô kơ’nâi vâ pơtối rak vế ivá rơdêi tơkŭm tâi tâng ivá ki rơdêi dêi kuăn pơlê tung pơlê, cheăm, tơring.