VOV4.Xơ Đăng - A kong pơlê Dak Lak, mot tung hơnăm hriâm nếo ối lối chât ngế hok tro, sinh viên ing tơnêi têa pú Lếo tiô hriâm. Hơnăm hriâm kố, ai vâ chê 60 ngế sinh viên, hok tro Lếo dế hriâm a mâu hngêi trung dêi kong pơlê Dak Lak. Ing tơdroăng tŏng kum, veăng ngăn dêi khu kăn pơkuâ ƀă mâu tíu pêi cheăng, hngêi trung, mâu vâi o dế kơdo mơ-eăm mơhriâm tâp vâ pro tơdroăng ki pói vâ tơná chiâng ai păng ‘nâng.

Sinh viên Thidphaphone Duangphachanh (25 tuổi, pơlê xiâm a kong pơlê  Attapeu, Kŏng hoa Yân chuh Nhân yân Lếo) dế hriâm khoa Y, Hngêi trung Đại học Tây Nguyên (pơlê kong kơdrâm Ƀuôn Ma Thuột, kong pơlê Dak Lak) ăm ‘nâi: ing mơ’nui hơnăm 2017, á lăm hriâm kơvâ Y Khoa hriâm tiô kơvâ ai hnoăng liăn mơhá ăm tâi tâng. Vâ chê 6 hơnăm hriâm akố, á mơ-eăm tơkâ luâ mâu tơdroăng pá, tơvâ tơvân, apoăng á hlo tơviah, hlo tơ-ê  ‘na khôi túa rêh ối, tơdroăng trâm tơpui tơno, ƀă tơdroăng veăng kum dêi hngêi trung, thái cô vâi pú, Thidphaphone hiăng hmâ ƀă tơdroăng rêh ối nếo, tơbrê tung hriâm, chôa lâng pêi pro tiô tơdroăng púi vâ dêi ƀok thái pơkeăng.

“Rah xo hriâm kơvâ cheăng ‘na khăm pơlât á vâ ‘nâng, xua hriâm ngăn pơkeăng pơlât cho vâ hlê, vâ rak ngăn ivá mơngế ki tamo ƀă khăm pơlât mâu ngế châi tamo. Châ khât hriâm ngăn pơkeăng pơlât pá ‘nâng la nâl tơpui cho pro pá, ƀă hlối pá vâ hlê, hrá hlê, kal thế rơkê khât ‘na tơdroăng hriâm cheăng, xua thế hriâm rơbot hên. A tơmiât kô vêh dêi a Lếo vâ pêi cheăng, vâ kum pơlât dêi kuăn pơlê’’. 

Sinh viên Thidphaphone Duangphachanh dế hriâm a hngêi trung Đại học Tây Nguyên

‘Na o Chansida Inthakhong (18 hơnăm, pơlê xiâm a kong pơlê Sekong, Kŏng hoa Yân chủ Nhân yân Lếo) dế hriâm a hngêi trung hnê kuăn ngo ai tíu kâ koi ối pơtê Tây Nguyên (dêi Khu xiâm pơkuâ ngăn lêng) a pơlê kong kơdrâm Ƀuôn Ma Thuột ăm ‘nâi: vâ chê 4 hơnăm ối a Dak Lak, á hiăng hmâ ƀă tơdroăng rêh ối a hngêi trung tiô tơdroăng pơkâ rêh ối dêi lêng.

“Rêh ối a hngêi trung cho tiô tơdroăng pơkâ dêi lêng, hâi chôu pơkâ kơtăng. Hdrối nah pá ‘nâng la hngêi trung tơmâng tŏng kum hnê mơhno, ‘na hriâm, kâ ôu, pâk vaccine drêng ai pơreăng COVID drêng dế ai pơreăng tâ tú, pêi pro tro.  Á cho môi ngế ối hngế ing hngêi lăm hriâm a Việt Nam hngêi trung mê á hlo môi tiah rơpŏng hngêi á, tơmâng tŏng kum á, mâu vâi pú xuân hmâ, hlối veăng kum a tŭm tơdroăng”.

Pêi pro tiô tơdroăng tơrŭm pro nhŏng o ƀă hlối tơhrâ tơrŭm cheăng pơla kong pơlê Dak Lak ƀă mâu kong pơlê peăng hdroh kong têa Lếo, ing hơnăm 2018 troh nôkố, hiăng ai hrĭng ngế hok tro, sinh viên Lếo troh lăm hriâm a Hngêi trung Đại học Tây Nguyên ƀă Hngêi trung hnê kuăn ngo ai tíu kâ koi ối pơtê Tây Nguyên hriâm tiê pơkâ ăm hnoăng liăn mơhá ing hên xiâm ki ê pơrá phá. Tung pơla hriâm, mâu ngế hok tro kong têa Lếo châ tŏng kum: ăm ối a tíu kâ koi ối pơtê la ôh tá êa nâp liăn, châ kum liăn rêm khế, veăng tơdah hêi Têt tiô khôi hmâ Bunpimay dêi mơngế Ngế Lếo a Ƀuôn Đôn, trâm mâ mâu ngế Lếo há ki lăm hriâm a Dak Lak.

Pôa Nguyễn Ngọc Phan, Ngế pơkuâ hngêi trung râ má pái hnê kuăn ngo ai tíu kâ koi ối pơtê Tây Nguyên ăm ‘nâi, hơnăm kố Hngêi trung ai 45 ngế hok tro Lếo dế hriâm akố. Tơdrêng ƀă mâu hnoăng liăn mơhá xua tơnêi têa ăm, hngêi trung xuân mơ-eăm mơhnhôk tăng mâu kơxô̆ liăn ing khu râ veăng tơlo vâ mơdêk tơ-brê tơdroăng hnê hriâm ăm mâu vâi o.

“Tâi tâng kơxô̆ liăn hnê hriâm ăm mâu vâi o xua hngêi trung ‘no, ƀă ivá dêi Hngêi trung, dêi mâu kăn ƀô̆, thái cô dêi hngêi trung vâ rơtế tơchoâm hnê vâ ai hên ngế ki rơkê tung kơpong pái tơnêi têa mơnhông tơtêk xuân môi tiah tơrŭm cheăng pơla péa tơnêi têa.

Tung la ngiâ, mê ngin kô mơ-eăm rơtế ƀă kong pơlê Sekong xuân môi tiah mâu kong pơlê peăng Hdroh kong têa Lếo tăng hên liăn vâ mơnhông mơdêk hnê hriâm ƀă hnê mơjiâng tuăn ngôa rơkê rế ton rế tơ ƀrê’’.

Khu tơrŭm cheăng pơla Việt Nam - Lếo kong pơlê Dak Lak hbru tơmeăm ăm hok tro Lếo ki dế hriâm a hngêi trung râ má pái hnê kuăn ngo ai tíu kâ koi ối pơtê Tây Nguyên

Tiô pôa Lê Văn Nghĩa,  Kăn xiâm hnê ngăn Khu tơrŭm cheăng pơla Việt Nam - Lếo, kong pơlê Dak Lak pơtối rak vế tơrŭm cheăng lěm tro, rơtế tơrŭm krá pơla péa tơnêi têa Việt Nam -Lếo, Dak Lak tối nhên môi tung mâu tơdroăng cheăng pêi ki xiâm pro ti lâi vâ tơdroăng hnê hriâm rế mơdêk tơƀrê vâ rế ai hnê mâu hok tro, sinh viên Lếo lăm hriâm a kong pơlê. Kong pơlê Dak Lak hiăng tơrŭm, tŏng kum, séa ngăn hnê mơhno, pro tơ’lêi hlâu má môi ăm 60 ngế hok tro Lếo dế hriâm a mâu hngêi trung tung kong pơlê Dak Lak.

Pơtối rak vế mâu tơdroăng hiăng pêi tơƀrê, 2 kong pơlê  kô pơtối pơ’lêh nhên tơdroăng tơhrâ, mơjiâng mâu tơdroăng pơkâ pêi cheăng dêi péa pâ. Pơtối rak vế tơdroăng, tơpui tơno ƀă tơrŭm krá khât vâ tơbleăng tro tơdroăng cheăng hnê hriâm, tơpui tơno ƀă hok tro.

“Pin veăng kum, pro tơ’lêi hlâu ing kuăn mơngế, hngêi trung kơƀăng tăng, tíu ối, pro tơ’lêi hlâu má môi vâ tơmâng khât tơdroăng hnê hriâm, hnê pơtâp mâu vâi muăn vâi o Lếo a kong pơlê. Ngin hiăng pâ tơdroăng pơkâ dêi Khu kăn Đảng ủy kong pơlê, khu kăn pơkuâ cheăng ƀă hnê mơhno tơdroăng tơrŭm pro nhŏng o pơla kuăn pơlê dêi kong pơlê Dak Lak ƀă mâu vâi muăn, kuăn cháu hok tro  vâ ing mê mâu vâi muăn, kuăn cháu kô ai môi hngêi ối ki hmâ ‘nâi hơ-ui pâ a kong pơlê Dak Lak vâ rak vế khôi túa lěm tro hnê hriâm ăm mâu vâi muăn, kuăn cháu hmiân tuăn hriâm. Ngin kô pơtối mơhnhôk pơlê pơla khu râ veăng tơlo liăn vâ veăng kum pêi pro tiô tơdroăng tơhrâ tơrŭm cheăng pơla 2 kong pơlê Dak Lak ƀă kong pơlê Sekong.

Péa kong pơlê kô pơtối tơrŭm tí tăng ngăn, séa ngăn tơdroăng cheăng pêi hôm tơ-brê tơdroăng tơmâng tŏng kum, rak ngăn hnê hriâm dêi hngêi trung hnê kuăn ngo ai tíu kâ koi ối pơtê Tây Nguyên (dêi Khu xiâm pơkuâ ngăn lêng) ƀă hngêi trung Đại học Tây Nguyên ƀă mâu vâi o hok tro, sinh viên mâu kong têa Lếo ki dế hriâm a 2 to hngêi trung mê”.

Hơnăm hriâm nếo 2022-2023 hiăng pơxiâm. Tơdrêng ƀă hok tro sinh viên Việt Nam, mâu hok tro Lếo ki dế hriâm a Dak Lak pơtối pêi pro tiô tơdroăng púi vâ, mơ-eăm khât tung hriâm vâ drêng vêh dêi a pơlê ah veăng mơjiâng dêi pơlê rế ton rế lěm tơƀrê tâ nếo.

H’Xíu H’Mok rah chêh

Gương tơplôu ƀă tơbleăng