Hơnăm ối nếo a 13 Đông Gak tíu tơkăng kong ƀă mâu tíu pêi cheăng Tiêuh đoân Huấn luyện – Cơ động, Lêng tuk gak tơkăng kong Khu pơkuâ ngăn Mố đô̆i gak tơkăng kong dêi kong pơlê Dak Lak hiăng lo tơkŭm pêi tơdroăng kring vế tơniăn pơlê pơla, mê cho lăm pôu kơ-êng, hbru tơmeăm ăm mâu rơpŏng xơpá, rơpŏng ai hnoăng tơnêi têa; diâp hnoăng liăn hriâm ăm hok tro kơtiê tơkâ luâ xơpá: ‘mâi rơnêu pro mâu tơmeăm khoăng, tíu hdró a tơkăng kong a têa kơxĭ ƀă a tơnêi.

Ki vâ tối dêi hơnăm ối nếo Mố đô̆i gak tơkăng kong Dak Lak rôh kố cho pêi tơdroăng cheăng hnê mơhno, tơbleăng luât ‘na hnoăng pơkuâ chuăn têa kơxĭ, rơlố, kring gak tơniăn tíu tơkăng kong, hlối hnê ‘na tơdroăng lăm tâ phĭu rah xo kăn Kuô̆k hô̆i hneăng 16 ƀă Hô̆i đong kuăn pơlê rêm râ hneăng 2026-2031, tơkŭm a hnoăng pơkuâ, hnoăng cheăng pêi pro dêi kuăn pơlê ‘na tơdroăng tâ phĭu.

Ing mê, mơdêk hlê plĕng tơdroăng kal kí, ‘no hnoăng pêi pro dei tơná ăm mâu đoân viên, droh rơtăm, kuăn pơlê ki tro hơnăm lăm tâ phiu a kơpong tơkăng kong tung pêi pro hnoăng pơkuâ ƀă tơdroăng cheăng thế pêi dêi kuăn pơlê, veăng mơnhông Tơnêi têa tro tiô luât.