VOV4.Xơ Đăng - Pơla kố nah, Đoân Droh rơtăm Kŏng san Hồ Chí Minh mâu kong pơlê tung kơpong Tây Nguyên hiăng tơkŭm po Hneăng hôp hneăng hơnăm 2022 – 2027. Ing mê ăm hlo, hneăng hiăng hluâ, tơdroăng pêi cheăng Đoân ƀă hnoăng dêi droh rơtăm phô̆m xông kân tung kơpong pêi hên tơdroăng ki lĕm tro, ai pơxúa ƀă mơjiâng hên tơmeăm, pêi pro hên tơdroăng cheăng ki pơxúa a hên kong pơlê.

Tiô tối tơbleăng a Hneăng hôp Đoân Droh rơtăm Kŏng san Hồ Chí Minh kong pơlê Gia Lai roh má 15, hneăng hdrối, hơnăm ối nếo  kong pơlê hiăng tơbleăng pêi hên tơdroăng cheăng ai pơxúa khât. Mê cho mâu tơdroăng mơhnhôk: ‘’Droh rơtăm pleăng hnoăng tơná a rơnó pơtê hriâm’’, ‘’Pro pơ’lêh tơdroăng tơchĕng tơmiât, túa pêi cheăng ƀă tơdroăng pêi cheăng tung kơpong hdroâng kuăn ngo vâ chôa ‘lâng mơnhông mơdêk hluăn ing kơtiê krá ton’’, ‘’Hơnăm ối nếo Gia Lai tơdjuôm ivá tơkâ luâ pơreăng kân‘’.  Klêi mê, pơtối rak vế tơdroăng ki mơ-eăm pleăng tơná dêi đoân viên, droh rơtăm.

Rôh kố, Khu kăn pơkuâ ngăn Đoân Droh rơtăm kong pơlê Gia Lai hiăng tơkŭm po tơdroăng khĕn kơdeăn mâu khu pú hên, mâu ngế ki ai hnoăng pêi cheăng kơhnâ rơkê tung hnoăng cheăng Đoân ƀă tơdroăng mơhnhôk mâu pêi mâu tơdroăng tung khu vâi o, mâu droh rơtăm hneăng hơnăm 2017-2022. Mê cho, hiăng ai 27 ngế ƀă 28 khu pú hên; Kăn hnê ngăn Vi ƀan kong pơlê Gia Lai diâp ƀâng kơdeăn khĕn ăm khu pú hên ƀă 10 ngế, hiăng ai hnoăng pêi cheăng kơhnâ rơkê tung tơdroăng cheăng Đoân ƀă tơdroăng mơhnhôk mâu vâi o, mâu droh rơtăm.

Ngoh Lê Thế Đô, Kăn hnê ngăn Đảng tơring  Čư̆ Prông châ Vi ƀan kong pơlê Gia Lai ăm ƀâng kơdeăn khĕn tối:

‘’Tung pơla hơnăm 2017-2022 hlối ai mâu tơdroăng ki xơpá, malối cho pơreăng tâ tú, la ƀă tơdroăng mơ-eăm khât dêi mâu hơnăm ối nếo Gia Lai hiăng châ pêi pro mâu tơdroăng ki pơxúa tung tơdroăng cheăng dêi mâu đoân viên ƀă tơdroăng mơhnhôk cheăng dêi mâu droh rơtăm ƀă mâu vâi o. Hâi kố á hâk tơngăm châ veăng hôp cho kăn ƀô̆ đoân châ khĕn kơdeăn mê a râk phiu ro, ƀă ngăn mê cho ki xiâm mơhnhôk á vâ mơ-eăm tâ nếo, pleăng hnoăng tơná ăm tơdroăng cheăng Đoân ƀă tơdroăng mơhnhôk mâu droh rơtăm mâu vâi o dêi kong pơlê rế ton rế mơnhông tơƀrê’’.

Hneăng hôp đoân viên Droh rơtăm Kŏng san Hồ Chí Minh kong pơlê Gia Lai rôh má 15

Ƀă tơdroăng pơxá pêi pro ‘’Tơrŭm môi tuăn - djâ troăng a hdrối -  Rơkê ƀeăn -Hriăn plĕng ki nếo - Púi vâ’’, Hneăng hôp Đoân Droh rơtăm Kŏng san Hồ Chí Minh kong pơlê Gia lai roh má 15 pơkâ 13 tơdroăng pơkâ pêi ki kal tung pơla hơnăm 2022 -2027. Môi tung mâu tơdroăng ki kal cho pêi tơƀrê mâu túa cheăng, troăng rơhlâ veăng kum, kơjo kum, veăng kum droh rơtăm ki pá puât; pơtối pêi tro mâu tơdroăng cheăng tŏng kum, pleăng hnoăng tơná lăm kum pêi mâu tưodroăng cheăng a pơlê cheăm vâ veăng ‘no hnoăng tơná tung tơdroăng kơdroh kơklêa xăm kơtiê ƀă mơjiâng thôn pơlê nếo a pơlê cheăm.

Ngoh Lê Trọng Phúc, Kăn hnê ngăn Đoân Droh rơtăm tơring Đức Cơ tối:

“’Tơngah ƀă mâu troăng tơdroăng mơhnhôk pêi pro pơtối rak vế pêi pro dêi droh rơtăm ƀă mâu tơdroăng rơtế ƀă mâu droh rơtăm, malối cho tơdroăng pơxiâm pêi cheăng ƀă pơxiâm pêi cheăng cho vâ pro tơ’lêi hlâu ăm mâu droh rơtăm  ai rôh châ mơ-eăm mơnhông ƀă xông mơdêi.

Púi vâ mâu kăn ki rơkê ai tŭm ivá, kơhnâ, mơnhông djâ tơdroăng cheăng đoân chiâng tơdroăng mơhnhôk droh rơtăm pleăng tơná pêi cheăng rế ton rế mơnhông tơƀrê’’.

Môi tiah mê, tung măng tĭng hdrối, Đoân Droh rơtăm Kŏng san Hồ Chí Minh kong pơlê Dak Lak xuân hiăng tơkŭm po Hneăng hôp mâu Kăn rôh má 12, hneăng hơnăm 2022 - 2027. Hdró  tơdroăng pêi pro tung 5 hơnăm hdrối dêi mâu hơnăm ối nếo Dak Lak  cho hiăng pêi pro châ lối 6.000 tơmeăm khoăng, peăng tơdroăng mâu droh rơtăm ƀă tâi tâng kơxô̆ liăn vâ chê 97,5% rơtal liăn. Mâu kăn ƀô̆ Đoân rêm râ đi đo pơtối rak vế hnoăng cheăng pêi, djâ troăng ahdrối ‘na tơdroăng mơhnhôk, kơhnâ ƀă tơdroăng cheăng, pêi tâi ivá tơná xua đoân viên droh rơtăm, 2 cho mâu ki xiâm djâ troăng mâu tơdroăng mơhnhôk tơ’noăng pâ nhoăm tơnêi têa tung mâu hơnăm ối nếo.

Rôh kố, Khu pơkuâ ngăn Đoân Droh rơtăm hiăng khĕn kơdeăn 25 tơmeăm khoăng ki mâu droh rơtăm mơjiâng pro ƀă 34 ngế kăn ƀô đoân pêi cheăng kơhnâ  rơkê pơla hơnăm 2017-2022.

Nâ Lương Thị Nga, Kăn hnê ngăn Đoân Droh rơtăm cheăm Ia Rvê, tơring Ea Sup, châ khĕn kơdeăn rôh kố tối:

“Á phiu ro ‘nâng. Má péa á tâ hơniâp ro ƀă tâ dêi tơná mơhúa hiăng châ pri mơhá ƀă púi vâ tiah kố, tung hneăng la ngiâ, á kô mơ-eăm tâ nếo, mơ-eăm vâ tơxâng ƀă inâi ki tơná hiăng châ xo, vâ tơkŭm mâu đoân viên, droh rơtăm mot tung khu tơrŭm cheăng Đoân. Mê cho môi tơdroăng cheăng, cho ki mơ-eăm khât, ôh tá xêto  dêi đoân viên mê ki tâi tâng mâu đoân tơrŭm ƀă dêi rơpó vâ rơtế veăng kum dêi rơpó, vâ hnê ăm mâu đoân viên, droh rơtăm veăng tung pêi cheăng’’.

Dak Lak khĕn kơdeăn 25 tơmeăm khoăng mơjiâng pro ƀă 34 ngế kăn ƀô Đoân pêi cheăng kơhnâ rơkê

Hdrối mê, Đoân Droh rơtăm Kŏng san Hồ Chí Minh kong pơlê Dak Nông cho tíu pêi cheăng ki apoăng tung kơpong Tây Nguyên hiăng tơkŭm po hneăng Hôp kân hneăn hơnăm 2022 – 2027. Môi tung mâu tơdroăng cheăng pêi ki tơƀrê má môi dêi hơnăm ối nếo Dak Nông cho veăng mơjiâng thôn pơlê nếo. Rêm khu râ kăn ƀô Đoân hiăng pêi pro vâ chê 7.000 tơmeăm khoăng, peăng tơdroăng cheăng droh rơtăm ƀă tâi tâng kơxô̆ liăn lối 38 rơtal liăn.

Hơnăm ối nếo kong pơlê Dak Nông xuân pêt nếo lối 700 rơpâu xiâm loăng ngiât; mơjiâng 127  tíu rêh ối, xah hêi ăm mâu droh rơtăm mâu vâi o,  tơkŭm pêi hên tơdroăng cheăng kum mâu vâi o ki xơpá ƀă tâi tâng kơxô̆ liăn lối 15 rơtal liăn.

Ƀă tơdroăng pơxá pêi pro: ‘’Hơnăm ối nếo Dak Nông djâ troăng ahdrối, púi vâ, hriăn plĕng ki nếo, mơnhông mơdêk’’, hneăng hôp Đoân Droh rơtăm Kŏng san Hồ Chí Minh kong pơlê Dak Nông roh má 4, hneăng hơnăm 2022-2027 hiăng pơkâ 12 khu tơdroăng pơkâ pêi, 8 tơdroăng tơkêa bro, tơdroăng ki kal ƀă mơ-eăm pro tơdroăng púi vâ chiâng mâu tơdroăng pêi pro ki pơxúa khât.

Tơxâng vâ tối cho mâu tơdroăng pơkâ môi tiah: Rêm hơnăm pêt nếo 250 rơpâu xiâm loăng ngiât; kum 10 to thôn, pơlê kơtiê xopá pê klêi tơdroăng pơkâ mơjiâng thôn pơlê nếo; kơjo kum 200 rơtal liăn ăm mâu droh rơtăm  mung liăn vâ pơxiâm pêi cheăng; tâng riên rêm hơnăm kơdroh lối 6% rơpŏng kơtiê xơpá dêi mâu hơnăm ối nếo hdroâng kuăn ngo.

VOV Tây Nguyên/Tơplôu: Gương