A kong pơlê Kon Tum, 2 hâi lơ 24, 25/12, kơdrâm vâi krâ kuăn khôp phiu ro rơtế veăng tơkŭm a hâi Tĭng kân a mâu hngêi khôp phiu ro tơdah Hâi tĭng kân Pâ Xeăng chu chiâng kuăn mơngế pói vâ ăm hơnăm 2023 mo châ tơniăn, hơniâp lĕm. Vâ tơdroăng phiu ro kơmăng tĭng kân Pâ Xeăng chu chiâng kuăn mơngế, hơniâp lĕm, mâu hngêi khôp ối tung Yăo phâ̆n Kon Tum pơrá tơrŭm ƀă Khu râ kăn pơkuâ kong pơlê tung tơdroăng rak tơniăn gak kring.

Bro rơnuâ hngêi khôp Loăng Kon Tum

A mâu hngêi khôp a pơlê kong kơdrâm Kon Tum, môi tiah: Hngêi khôp loăng, Hngêi khôp yăo xư̆ Tân Hương, Hngêi khôp yăo xư̆ Phương Nghĩa ƀă hía hé, tíu tơkŭm po kơdrâm kuăn khôp ƀă tơmối ối hbrâ rak tơniăn troăng klông rơtâ tá kơpong hngêi khôp.

Bro rơnuâ hngêi khôp Loăng Kon Tum

Tơpui ƀă khu râ kăn pơkuâ, mâu râ troh lăm pôu, rơkâu Hâi tĭng kân Pâ Xeăng chu chiâng kuăn mơngế, Ƀok xối kân Hngêi khôp kân Yăo phâ̆n Kon Tum Nguyễn Hùng Vị tối, tơdroăng rơtế hdroâng mơngế, rơtế ƀă tơnêi têa dêi Yăo phâ̆n Kon Tum ƀă vâi krâ kuăn khôp.

A Gia Lai, tung kơmăng lơ 24/12 ƀă hâi lơ 25/12, kuăn pơlê tiô khôp Pâ Xeăng ƀă Tin Lành a Gia Lai hiăng tơvâ tơvân tơdroăng cheăng tơdah hâi tĭng kân Pâ Xeăng chu chiâng kuăn mơngế hơnăm 2022. A pơlê kong kơdrâm Plei Ku, tơdroăng xôk ro hâi tĭng kân Pâ Xeăng chu chiâng kuăn mơngế a mâu Hngêi khôp kơdrâm mơngế. A mâu hngêi khôp Thăng Thiên (bêng Tây Sơn) Hngêi khôp Thánh Tâm (bêng Phù Đổng), Hngêi khôp Mẹ vô nhiễm (bêng Hoa Lư) , Hngêi khôp Đức An (bêng Ia Kring)... kuăn pơlê ki tiô khôp Pâ Xeăng rơtế tơkŭm to khôp hâi tĭng kân Noel hơniâp ro.

Klêi kơ’nâi hên hơnăm tro tơdjâk xua pơreăng, hơnăm kố, tâ môi tiah phuâng iâ hơniâp ro châ tơkŭm hâk ro hâi tĭng kân Pâ Xeăng chu chiâng kuăn mơngế  môi tiah ro tơ’nôm tung tâi tâng kuăn pơlê ki tiô khôp, xuân môi tiah mâu kuăn pơlê, malối mâu rơxông nếo. Kơxô̆ mâu vâi o ki nếo xông kân ƀă mâu kuăn pơlê ki veăng xah hêi drô kơphô̆ ƀă mâu tơdroăng hêi ki ê xuân tâk hên tâ tâng vâ pơchông ƀă mâu hơnăm hdrối.

Mâu khu râ pơkuâ cheăng rêm râ xuân hiăng mơdêk hnoăng cheăng kring gak drô troăng prôk vâ rak tơniăn. Tung rôh kố, khu râ đảng ƀă mâu kăn, Măt trâ̆n ƀă rêm râ tung kong pơlê hiăng tơmâng khât, lăm pôu, teăm rơkâu mâu hngêi khôp Pâ Xeăng ƀă mâu hngêi khôp Tin Lành.