VOV4.Xơ Đăng - Kơxo lơ 29/7, a tíu pêi cheăng Chin phuh, Khu hnê mơhno mơgêi pêi pro Luât tơnêi tơníu ƀă mơjiâng Tơdroăng tơkêa bro Luât tơnêi tơníu (‘mâi rơnêu) hôp roh má môi. Pôa Lê Văn Thành, Ngế pro xiâm phŏ hnê ngăn tơnêi têa, Kăn pơkuâ Khu hnê mơhno pơkuâ roh hôp. Tiô Khu xiâm pơkuâ Kế tơmeăm khoăng loăng pơlái kong kế ƀă Kong prâi, klêi kơ’nâi lối 8 hơnăm tơkŭm po pêi pro Luât tơnêi tơníu, tơdroăng pơkuâ tơnêi tơníu hiăng châ mâu tơdroăng châ tơƀrê.

Laga drêng pêi pro luât xuân u ối mâu tơdroăng pá puât, tơvâ tơvân môi tiah: Pơkâ pêi tá hâi tơniăn tơkŭm tâi tâng chiâng môi, môi tuăn ƀă tơdâng tơ’mô; Tơdroăng xo tơvêh tơnêi, chêl liăn, tŏng kum, xĕn kuăn pơlê rêh ối ai tíu tá hâi tơniăn tơtro ki pơxúa dêi kuăn pơlê; tơxup tơbriât, săm tối săm tơkêng tơdroăng xôi luât ‘na tơnêi tơníu ối hên ƀă hía hé. Xua mê tơdroăng mơjiâng Tơdroăng tơkêa bro Luât tơnêi tơníu (‘mâi rơnêu) cho kal. Mơgêi roh hôp, pôa Lê Văn Thành, Ngế pro xiâm phŏ hnê ngăn tơnêi têa pơkâ thế Khu rah chêh mơjiâng tơdroăng tơkêa bro luât tơnêi tơníu (‘mâi rơnêu) kal pêi tiô Pơkâ kơxô̆ 18 dêi Hneăng hôp roh má pơtăm, Khu xiâm pơkuâ tơnêi têa hneăng má 13 vâ tơniăn mơdêk ki châ tơƀrê, pơkuâ ƀă xúa tơnêi, mơhnhôk djâ tơnêi têa chiâng tơnêi têa mơnhông mơdêk pêi lo liăn hên.

A Sa Ly tơplôu ƀă tơbleăng