Kơ’nâi 2 hâi tơdế pêi cheăng thâ rĕng ƀă ai hnoăng pêi krâu khât, Kuô̆k hô̆i hiăng hôp klêi tơniăn lĕm rôh kơ-êng ƀă tiâ tơdroăng kơ-êng a rôh hôp má 5. Kơxo hâi lơ 8/6, tơbleăng  mơgêi a rôh kơ-êng, pôa Vương Đình Huệ, Kăn xiâm hnê ngăn Kuô̆k hô̆i tối: Rôh kơ-êng tiâ po tung tơdroăng môi tiăn, tơpui tơdrăng, hên ngế tơpui, tơ’mot hên ngế vâ ‘nâi plĕng, hên kuăn pơlê tung lâp tơnêi têa tơmâng vâ ‘nâi plĕng.

A rôh hôp mê, hiăng ai 454 hdrôh ngế kăn Kuô̆k hô̆i chêh inâi vâ kơ-êng , 49 hdrôh ngế Kuô̆k hô̆i hiăng tơpui tơpeăng vâ mơnhên tâ mâu tơdroăng ki mâu kăn, kuăn pơlê tơmâng vâ ‘nâi plĕng, pơtối mơhno ăm hlo kố cho tơdroăng séa ngăn kân khât tơdrêng, tơƀrê dêi Kuô̆k hô̆i. Rôh kơ-êng tiâ hiăng mơhno tơdroăng  pêi cheăng tơpui tối nhên hnoăng cheăng, tối nhên troăng rơhlâ pêi pro; la hôm tơƀrê klêi tơniăn lĕm há lơ ôh ối kơnôm ngăn a tơdroăng pêi pro mâu tơdroăng tơhrâ, rơkong tơhrâ dêi Chin phuh, mâu kăn pêi cheăng tung Chin phuh.