Kơxê măng lơ 29/06, Khu xiâm pơkuâ hnê hriâm ƀă Hnê mơjiâng tuăn ngôa rơkê tơkŭm po hôp tơbleăng ‘na Hneăng tơ’noăng mơgêi râ má pái phôh thong hơnăm 2023. Pôa Phạm Ngọc Thưởng, Ngế xiâm phŏ – Kăn pơkuâ Khu hnê mơhno râ Tơnêi têa Hneăng tơ’noăng mơgêi râ má pái phôh thong hơnăm 2023 pơkuâ hôp tơbleăng.

Hneăng tơ’noăng mơgêi râ má pái phôh thong hơnăm kố ai lối 1 rơtuh ngế hok tro kĭ veăng tơ’noăng. Hluâ 2 hâi tơ’noăng kơxô̆ hok tro troh veăng tơ’noăng châ 98,86%. Lâp tơnêi têa ai 2.272 tíu tơ’noăng ƀă 43.032 kơbong tơ’noăng. Mơnhên apoăng, tơdroăng hbrâ rơnáu tơkŭm po tơ’noăng châ pêi pro hbrâ xêh, nhên, tŭm têk.

Tơdroăng tơkŭm po ngăn tơ’noăng a tâi tâng mâu Tíu tơ’noăng tơniăn kơtăng; Ko ƀai tơ’noăng ối tung tơdroăng hnê hriâm râ má pái phôh thong, tiô tơdroăng hnê hriâm tung kơxop mơ-éa tơtro tiô pơkâ vâ mơnhên mơgêi râ má pái phôh thong ƀă tơbleăng tơdroăng ki loi tơngah vâ mâu khu pơkuâ hnê hriâm đăi hok, hnê hriâm cheăng pêi veăng séa ngăn xúa tung rah xo hok tro.

Tơdroăng hbrâ mơdât lu lêa xúa kŏng ngê̆ hiăng châ pơkuâ kơtăng, laga, tung tơdroăng ngăn tơ’noăng ki nhên, ai 41 ngế hok tro tro ăm pơtê tơ’noăng. A roh hôp tơbleăng, teăng mâ Khu xiâm pơkuâ hnê hriâm ƀă Hnê mơjiâng tuăn ngôa rơkê xuân tiâ hên rơkong kơ-êng tơdroăng ko ƀai tơ’noăng; châ lo pa kong ko tơ’noăng a Cao Bằng, Yên Bái ƀă hía hé.