Mâu kăn tơkŭm tơpui tơno, ăm rơkong veăng tơpui tối ƀă 17 tơdroăng tơkêa luât ki kal, tiô tối hdrối pơtroh ăm Kuô̆k hô̆i a Hneăng hôp má péa, Kuô̆k hô̆i hneăng má XVI. Tơpui pơxiâm po hneăng hôp, pôa Trần Thanh Mẫn, Kăn xiâm hnê ngăn Kuô̆k hô̆i tối nhên pơkâ mơdêk ki dâi lĕm tơdroăng cheăng mơjiâng luât, pơxiâm ing ki dâi lĕm troăng hơlâ, ôh tá tiô kơxô̆ luât pơkâ. Mâu tơdroăng tơkêa luât athế tơleăng mơnhên mâu tơdroăng ki ai khât, tah lôi tíu ki tơvâ tơvân, mơhnhôk ivá, rak vế hnoăng ƀă ki pơxúa tro luât dêi kuăn pơlê, khu mơdró kâ.

Kăn xiâm hnê ngăn Kuô̆k hô̆i pơkâ thế ôh tá pơhlêh mâu tơdroăng ki pá, tơdjâk troh hnoăng kuăn mơngế, hnoăng kuăn pơlê, tơdroăng tê mơdró, xing xoăng kơxô̆ liăn ƀă tơkŭm hnoăng pơkuâ chu a tơdroăng pơkâ, tơdroăng hnê mơhno. Tơdrêng amê, tơdroăng mơjiâng luât thế rak tơniăn tơdâng tơ'mô pơla mâu luât, tơtro túa pơkuâ kong pơlê péa râ, mơdêk xing xoăng râ, xing xoăng hnoăng, vâ mâu tơdroăng pơkâ drêng tơbleăng pêi châ tơƀrê tung tơdroăng ki ai khât.