Kơxê lơ 19/4, Vi ƀan hdroâng kuăn ngo ƀă Vi ƀan kong pơlê Quảng Ngãi tơrŭm tơkŭm po Hneăng hôp tơpui tơno túa ki rơkê tơtro pêi pro tơdroăng pơkâ xiâm Tơnêi têa mơdêk cheăng kâ – rêh ối pơlê pơla kơpong vâi krâ hdroâng kuăn ngo ƀă kong ngo hneăng hơnăm 2021 – 2030, hneăng má I: sap hơnăm 2021 troh hơnăm 2025 dêi 19 kong pơlê kơpong peăng Tơdế tơnêi têa – Tây Nguyên.

Kố cho hneăng hôp tơpui tơno vâ mâu kong pơlê kơpong peăng tơdế tơnêi têa – Tây Nguyên tối tơdjuôm ƀă kong pơlê Quảng Ngãi tối krê tối ăm dêi pó túa ki rơkê tơtro, troăng pêi ki rơkê, xuân môi tiah tối mâu tơdroăng pá puât, pơloăng mơnúa dêi kong pơlê vâ mâu kơ koan Tơnêi têa ti tăng troăng tah lôi.

Tơbleăng ăm pêi pro Hneăng hôp, pôa Hầu A Lềnh, Ngế xiâm – Kăn pơkuâ Vi ƀan hdroâng kuăn ngo pói vâ pơtối châ tơdah mâu rơkong veăng tơpui tơdrăng, teăm tơdrêng dêi mâu kong pơlê. Tơdrêng amê, tơkêa tơrŭm krá tơniăn ƀă mâu kơ koan Tơnêi têa ƀă mâu pêi cheăng hdroâng kuăn ngo a kong pơlê, ki rơhêng vâ tối cho kơpong peăng Tơdế tơnêi têa – Tây Nguyên ƀă peăng mâ hâi lo pá hdroh tơnêi têa khŏm pêi pro ƀlêi trâng ƀă kêi đeăng 100% mâu pơkâ mơ’no a pơkâ kơxô̆ 1719/QĐ-TTg hâi lơ 14/10/2021 dêi Ngế pro xiâm hnê ngăn Chin phuh.