Mâu hơnăm hdrối mê hía nah, pêi pro tiô tơdroăng pơkâ kơxô̆ 05 ‘’ ‘Na mơdêk hriâm tâp ƀă pêi pro tiô hiâm mơno, pêi cheăng, túa rêh ối Hồ Chí Minh”, hiăng chiâng tơdroăng ki pêi tiah hmâ, mơhnŏng pêi pro xêh tung tơdroăng hôp chi ƀô̆ ƀă tung hnoăng cheăng dêi khu kăn ƀô̆, đảng viên tung lâp tơnêi têa. Malối hiăng mơdêk châ hnoăng cheăng djâ troăng hdrối dêi kăn ƀô̆, đảng viên, malối cho kăn ƀô̆ pơkuâ, rak ngăn, ngế ki ối a ko mâu tíu pêi cheăng tung tơdroăng ki hlê plĕng trâu rơdâ tâ ‘na hiâm mơno, túa rêh ối Hồ Chí Minh. Hbrâ mơdât, mâu tơdroăng tơmiât bro ôh tá tơniăn tơdroăng kal kí, túa rêh ối ƀă mâu tơdroăng ki mơhno ăm hlo hmốu pơ pro xêh, hmôu pơ hơ’lêh xêh tung tíu pêi cheăng.

*** Pôa Đinh Tiến Dũng, Kăn pơkuâ hnê ngăn Đảng Pơlê kong kân Hà Nội tối ăm ‘nâi, tung mơnhên dêi Tơnêi têa, Đảng ƀô̆ Pơlê kong kân Hà Nội cho môi tung mâu pơlê kong kân ối má môi lâp tơnêi têa ƀă hên troăng pêi ki tro, troăng pêi nếo, tơmiât pêi rơkê tung pêi pro hriâm tâp ƀă pêi tiô troăng tơdjâ, hiâm mơno Hồ Chí Minh. Mơnhên, mơnhông mơdêk mâu tơdroăng châ tơƀrê, tung la ngiâ Đảng ƀô̆ Hà Nội pơtối mơnhên tơdroăng hriâm tâp ƀă pêi tiô troăng tơdjâ, hiâm mơno Hồ Chí Minh cho môi tơdroăng xiâm ki kal tung tơdroăng mơjiâng, rak tơniăn tung Đảng, kum mơjiâng Đảng ƀô̆ Hà Nội krúa lĕm, ó rơdêi, kum pêi kêi đeăng mâu hnoăng cheăng kal kí dêi pơlê kong kân:

“Pơtối pơhlêh nếo ó rơdêi troăng tơmiât, troăng pêi, ki hbrâ xêh, tơmiât pêi rơkê, kơtăng, châ tơƀrê, kâi trâng ƀă troăng tơkŭm po nếo ƀă tơtro ƀă  tơdroăng nôkố dêi pơlê kong xiâm. Rak krá tơniăn tơdroăng ki vâ pêi, mơ-eăm pơkâ xiâm mơjiâng mơngế Hà Nội lĕm, rơkê, mơnhông mơdêk ki kơnâ mơngế plĕng hên tơdroăng dêi Thăng Long – Hà Nội rơpâu hơnăm lĕm sap ing chal vâi kăn krâ nah.

Hlối pêi pro tơdroăng hriâm tâp ƀă pêi tiô troăng tơdjâ hiâm mơno, troăng tơdjâ Pôa Hồ Chí Minh ƀă pêi pro Pơkâ tơpui kâ lĕm dêi kăn ƀô̆, kŏng chưk, viên chưk, mơngế pêi cheăng tung mâu kơ koan ối tung pơlê kong kân Hà Nội; Pơkâ tơpui kâ tíu tơdjuôm pơlê pơla tung pơlê kong kân ƀă Pơkâ pêi kơtăng kheăn hôu, mâu pơkâ pro tơniăn tung pơkuâ tơnêi têa; pơhlêh nếo troăng prôk, troăng pêi cheăng, mơjiâng tơdroăng ki pơhlêh ó rơdêi, tơtro tung pêi tơdroăng cheăng tơnêi têa dêi kăn ƀô̆, kŏng chưk pơlê kong kân Hà Nội.’’