Kơxo hâi lơ 16/5, a Hà Nội pơxiâm po hneăng Hôp tơpui tơno kơpong “Hriĕn plĕng dêi kăn hơnăm ối nếo Đông Nam Á - YSELI  2023” xua kăn  teăng mâ Mih a Việt Nam ƀă Hngêi trung Đại học Kinh tế Quốc dân tơrŭm ƀă tơkŭm po. Hneăng hôp vâ mơdêk tơrŭm cheăng lâp plâi tơnêi, cho rôh vâ mơngế ki veăng hôp tơui tối ‘na mâu tơdroăng tơná tơchĕng tơmiât hnê hriâm, hriâm túa pêi cheăng ing mâu ki rơkê, ki vâi ô eăng, ing mê pro xiâm mâu troăng rơhlâ hriăn plĕng hdrối tơdroăng pơloăng mơnúa ki lâp plâi tơnêi dế trâm.

Veăng tơdroăng “Hriăn plĕng dêi kăn hơnăm ối nếo Đông Nam Á  - YSELI   2023” cho 75 ngế giảng viên, mâu khu pơkâ ƀă mơhnhôk pêi pro tiô luât pơkâ, tơkâ luâ tơdroăng rah xo kơtăng ƀă lối 900 ngế lo ing mâu kong têa ASEAN ƀă Timor Leste.

Tung pơla pêi tơdroăng mê ton 4 hâi, mơngế veăng kô ai rôh tơpui tơno, hriâm ƀối ƀă tơpui tối hnê ăm dêi rơpó ing hên tơdroăng cheăng pơrá phá dêi pó, ing mâu rôh hôp tơpui tâi tâng, tơpui dêi khu pú iâ, troh mâu hneăng lăm prôk ngăn.