Ing môi tơbăng prêi ki lĕm, Kơpong Tíu xối tơbâ khu lêng Gạc Ma kố hiăng chiâng ‘’tíu cheăng ki kal dêi kăch măng’’ hnê mơhno tiô khôi vâi krâ nah ƀă tơbêng ăm hiâm mơno pâ nhuô̆m tơnêi têa ăm hên khu rơxông kơ’nâi hlê plĕng nhên. Rêm hơnăm, ai chât rơpâu ngế kuăn pơlê, kăn ƀô̆, mâu lêng, đoân viên droh rơtăm ƀă tơmối ing lâp lu kơpong tơnêi têa tí tăng troh têk nhang, tơbâ mâu ngế lêng hiăng hlâ tung roh tơplâ lêng xâ a Gạc Ma hơnăm 1988, ing mê, veăng gâk kring hnoăng pơkuâ têa kơxĭ, tơnêi tíu ki kơnía, krip krih dêi Tơnêi têa pin.

Nâ Nguyễn Thị Thanh Hà, ngế pêi cheăng a kơpong Tíu xối tơbâ Gạc Ma tối ăm ngin ‘nâi, mâu hâi tung khế Pái, ƀă tơdroăng ki kal kố, mâu ngế troh têk nhang, tơbâ vế mâu ngế lêng khên tơnôu rế hía rế troh akố kơdrâm tâ, mơhno, chúa vế trâu hơngế tung tuăn mơno dêi rêm khu rơxông nếo hâi kố ƀă mâu lêng hiăng hlâ hía xua veăng mơ’no dêi hnoăng kân tung kring vế têa kơxĭ rơlố dêi pơlê xiâm.

“Kơpong ki kố hdrối nah bu cho môi ngo to prê, loăng tá hâi ai. Tung pơla kố nah, ngin hiăng pêt tơ’nôm hên loăng vâ ăm xâp rơngiâp. Troh nôkố ai loăng hiăng xông kân lĕm, tíu kố chiâng rơngiâp lĕm tâ. Tơmối troh lăm ngăn kơdrâm laga xuân châ hnê mơhno prôk lăm xua mê ôh tá ai tơdroăng ki hâ ho, chôm drô troăng prôk’’.

Akố, rêm pơ’leăng nhang châ chôu cho môi rơkong pâ mơnê pơtroh mâu ngế kuăn tơnêi Việt Nam hiăng ối a kơpong têa kơxĭ. Kơtăn kố ai 38 hơnăm, a hâi lơ 14/3/1988, a mâu tíu tơbăng hmốu Gạc Ma, Cô Lin ƀă Len Đao ối tung rơlố Trường Sa, kong pơlê Khánh Hòa, mâu kăn ƀô̆, mâu lêng kring vế, gak ngăn têa kơxĭ kuăn pơlê Việt Nam hiăng tơpĕng tơplâ kơtăng ó khât vâ kring vế Tơnêi têa.

Hâi kố, hiâm mơno mê xuân pơtối châ pơchân tối ƀă troh lâp lu rêm roh lăm hyôu ngăn a Kơpong xối tơbâ Gạc Ma. Ngoh Trần Đăng Đức, kuăn pơlê a rơlố Cam Ranh, kong pơlê Khánh Hòa tối:

‘’Kố cho môi khôi túa vâi krâ nah dêi kŏng ti. Hơnăm ki lâi ngin xuân troh pâ phêp lăm troh akố vâ koh mơnê, xối pleăng, têk  nhang tơbâ mâu ngế kuăn dêi tơnêi têa hiăng hlâ tung hneăng tơplâ xâ. Ing mê, mơhno hiâm mơno pâ mơnê ƀă pói vâ tơnêi têa châ tơniăn lĕm, mơnhông mơdêk, ki rơhêng vâ tối a kơpong têa kơxĭ rơlố ƀă tơraih tơƀai’’.

Tơdroăng ki tơbâ ‘na tíu xối tơbâ Gạc Ma ối cho tơdroăng ki tơbâ krih tơviah dêi hên rơpŏng nhŏng o hiăng hlâ a têa kơxĭ rơlố. Tơdroăng ki pleăng mơheăm chhá dêi mâu vâi ngoh ôh tá xê to châ tơbâ tung tơdroăng roh nah, mê ối chiâng tơdroăng ki vâ hnê tối pơchân vâ ăm mâu rơxông nếo hâi kố pơtối pêi pro tiô, veăngu ‘no dêi ivá mơno kring vế, gak ngăn rêm xơtá tơnêi, rêm kơto têa kơxĭ dêi Tơnêi têa.

Ƀă ngế kuăn dêi mâu lêng Gạc Ma, tơdroăng xối tơbâ ‘na pâ pôa roh mê nah ôh tá xê to tơdroăng ki ton roh nah, mê ối cho hnoăng ki hâk tơngăm ƀă pôu râng hnoăng cheăng ki pơtối rak vế khôi vâi krâ nah. Hên ngế hiăng rah hnoăng cheăng tơná, mot tung khu lêng, pơtối pleăng rơxông ối nếo ăm hnoăng kring vế, gak ngăn têa kơxĭ rơlố. Nâ Trần Thị Thủy, dế pêi cheăng a Lưh đoân 146 - Trường Sa, kuăn kơdrâi dêi Ngế lêng khên tơnôu Trần Văn Phương tối tiah kố:

“Rơxông pâ á nah rơtế ƀă dêi khu hiăng pleăng mơheăm chhá a tíu kơpong têa kơxĭ vâ kring vế, gak ngăn Tơnêi têa, rak rêm kơpong tơnêi ki kơnía, krip krih dêi Việt Nam. Á cho rơxông nếo, ối hên tơdroăng ki vâ kơdo mơ-eăm, xua mê pói vâ châ pleăng ivá dêi tơná ăm tơdroăng kring vế Tơnêi têa ƀă hnoăng pơkuâ ngăn têa kơxĭ’’.

Ôh tá xê to tíu ki xối tơbâ mâu ngế khên tơnôu, Kơpong tơbâ mâu lêng Gạc Ma mê ối cho tíu hnê hriâm tiô khôi vâi krâ nah ăm hên tíu pêi cheăng dêi khu lêng, ki rơhêng vâ tối cho kăn ƀô̆, mâu lêng hơnăm ối nếo. Hên tíu cheăng ối tung Khu lêng kring vế, gak ngăn têa kơxĭ mê Kuăn pơlê Việt Nam đi đo tơkŭm po hneăng mơnê ăm mâu kăn ƀô̆ troh tek nhang, lăm ngăn, tí tăng plĕng tơdroăng roh nah vâ tơbêng ihiâm mơno loi tơngah ƀă tơdroăng khŏm mơ-eăm kring vế, gak ngăn hnoăng pơkuâ têa kơxĭ, chuăn  rơlố.

Ing mâu tơdroăng pêi akố, rêm ngế kăn ƀô̆, mâu lêng thăm ‘nâi ki kơnía dêi tơdroăng hơniâp lĕm, ing mê, pơtối mơnhông khôi túa, vêa vong vâi krâ nah ki khên tơnôu, mơ-eăm pơtâp tơdroăng ki rơkê, hbrâ tơplâ, khŏm mơ-eăm kring vế hnoăng krá tơniăn hnoăng pơkuâ têa kơxĭ, rơlố krip krih dêi Tơnêi têa. Trung tă Dương Trọng Hà, Kăn pơkuâ hnê ngăn Đoân tíu pêi cheăng Trung Đoân 196 tối ăm ngin ‘nâi:

“Têk nhang, xối tơbâ, lăm ngăn vâ mơhriâm, ‘nâi nhên a Kơpong xối tơbâ cho tơdroăng pêi đi đo dêi Trung đoân 196. Ki rơhêng vâ tối, ƀă kăn ƀô̆ mâu lêng nếo troh a đông lêng kô ‘nâi khôi túa vâi krâ nah dêi Khu lêng ƀă mâu ngế ki khên tơnôu, mâu lêng hiăng khên tơnôu tơplâ, hlâ rêh. Rak tơniăn ăm kăn ƀô̆, mâu lêng krá rơdêi kal kí, tuăn tơmiât, hiâm mơno hâk tơngăm ƀă tơdroăng khŏm mơ-eăm vâ tah lôi mâu tơdroăng pá puât’’.

Pái chât tơheăm hơnăm hiăng tơkâ hluâ, mâu rơkong tơkêa kring vế, rak ngăn rơlố hơnăm ki lâi xuân chuât tung dế têa kơxĭ. Ing kơpong tơbâ Gạc Ma hâi kố, hiâm mơno mê pơtối châ hnê ăm rơxông ối nếo, vâ mâu ngế lêng tíu têa kơxĭ đi đo krá kâk, kuâ kŏng râng hnêa, gâk kring hnoăng pơkuâ têa kơxĭ, rơlố ki kơnía, krip krih dêi Tơnêi têa.