Hâi Lâp plâi tơnêi vâi hdrêng (1/6) ƀă xuân cho hâi Trếo piê kơhiâm, tung 2 hâi lơ 1 ƀă lơ 2/6, Khu xiâm pơkuâ ngăn pơkeăng ƀă khăm pơlât pêi pro Troăng pêi tơ’nôm Vitamin A roh má 1 hơnăm 2023 ăm vâi hdrêng tung lâp tơnêi têa. Jâ Đào Hồng Lan, Ngế xiâm pơkuâ ngăn pơkeăng ƀă khăm pơlât lăm séa ngăn tơdroăng pêi pro tơdroăng kố a bêng Điện Biên, pơlê kân Ba Đình, Hà Nội. Tơbleăng ƀă Khu râ kăn pêi cheăng dêi Khu xiâm pơkuâ ngăn pơkeăng ƀă khăm pơlât, jâ Trần Thị Nhi Hà, Kăn pơkuâ ngăn pơkeăng ƀă khăm pơlât Hà Nội tối ăm ‘nâi: roh kố tung pơlê kong xiâm ai lối 630.000 ngế vâi hdrêng tro hơnăm ô Vitamin A, a 1.744 tíu.

Jâ Đào Hồng Lan tối ăm ‘nâi, Vitamin A tơ’nôm ăm vâi hdrêng châ tơkŭm po Vitamin Angel – Mih tŏng kum. Tung pơla kố nah, tíu mơjiâng pro trâm pá puât xua mê kơxô̆ Vitamin A roh kố châ xing xoăng hrá. Tiô tối hdrối ai dâng 6 rơtuh ngế vâi hdrêng tung lâp tơnêi têa châ ô tơ’nôm Vitamin A.

Krê a 22 kong pơlê kong ngo pá puât, hơmăm ô Vitamin A châ po rơdâ tâ, sap ing 6 khế troh 59 khế. Pakĭng mê, vâi hdrêng sap ing 24 troh 59 khế châ ăm ôu pơkeăng kơdê ôa ngâng tiô hneăng. Roh pêi tơdroăng kố hiăng kum tơnêi têa pin mơdât pơreăng plôm mâ xua ôh tá tŭm Vitamin A a hơnăm 2000.