Pơtối pêi mâu tơdroăng cheăng a mâu Kong têa Ả-rập Thống nhất (UAE), tung mâu hâi lơ 3 troh hâi lơ 4/5/2023, jâ Võ Thị Ánh Xuân, Kăn xiâm phŏ hnê ngăn tơnêi têa hiăng pêi cheăng ƀă Học viện Ngoại giao Anwar Gargash, Grup Masdar, Grup Mubadala lăm pôu Kăn teăng mâ Việt Nam ƀă hlối trâm kăn teăng mâ mơngế Việt Nam a UAE.

A rôh trâm mâ, jâ Võ Thị Ánh Xuân, Kăn xiâm phŏ hnê ngăn tơnêi têa tối ‘na mâu tơdroăng vâ pêi ki kân tung luât pơkâ tŏng kum ‘na tơpui kâ Việt Nam, tung mê tối pêi a hdrối cho tơrŭm cheăng ƀă mơnhông mơdêk tơƀrê, hên troăng, hên túa tơrŭm cheăng tơpui kâ, cho pú hmâ, cho kong têa ki tơrŭm cheăng loi nhoăm dêi rơpó ƀă cho khu ki kơhnâ khât, ‘nâi hnoăng cheăng tơná pêi tung mâu kong têa lâp plâi tơnêi.

Tung hneăng lăm pôu mâu Grup Masdar, Grup Mubadala, péa Grup pêi cheăng ki má môi dêi UAE tung kơvâ cheăng ‘na on tơhrik ki ‘mâi mơjiâng pro, jâ Võ Thị Ánh Xuân tối ‘na mâu tơdroăng tŏng kum dêi Việt Nam tung tơ’mot kong têa ê ‘no liăn pêi cheăng a tơnêi têa pin, malối tung kơvâ cheăng mơdêk ngiât lĕm ƀă krá ton.

Kăn xiâm phŏ hnê ngăn tơnêi têa tối Việt Nam ƀă UAE ai hên tơmeăm khoăng ki ai hlâu vâ tơrŭm cheăng ƀă tung kơvâ cheăng mê hlối púi vâ mâu kŏng ti séa ngăn nhên ‘no liăn cheăng a mâu tơdroăng tơkêa bro mơjiâng on tơhrik a Việt Nam.