Klăng khế pêi tơdroăng tŏng kum vâi hdrêng, hâi lơ 15/6, a tơring Thanh Hà, kong pơlê Hải Dương, jâ Võ Thị Ánh Xuân, Kăn xiâm phŏ hnê ngăn tơnêi têa, Kăn xiâm hnê ngăn Hô̆i đong tŏng kum kơxô̆ liăn kum vâi hdrêng Việt Nam hiăng troh lăm pôu diâp kơxuô tơmeăm ăm vâi hdrêng ai tơdroăng rêh ối pá puât a tơring. A tơdroăng pêi pro kố, jâ Võ Thị Ánh Xuân hiăng tá hiâm mơno mơhnhôk, kơ-êng ƀă rơtế kăn teăng mâ khu tŏng kum diâp 50 toăng rơxế mái, 100 hnoăng liăn hriâm rơkê ăm 150 ngế vâi hdrêng ai tơdroăng rêh ối pá puât a tơring Thanh Hà ƀă tâi tâng kơxô̆ liăn lối 260 rơtuh liăn.

Ƀă kơxô̆ liăn tŏng kum vâi hdrêng Việt Nam diâp ăm tâi tâng 100 toăng rơxế mái, hên kơxuô tơmeăm ƀă mâu hnoăng liăn hriâm rơkê ƀă tâi tâng kơnâ lối 1,3 rơtal liăn ăm vâi hdrêng ai tơdroăng rêh ối pá puât a Hải Dương. Sap apoăng hơnăm troh nôkố, Khu pơkuâ râng kơxô̆ liăn tŏng kum vâi hdrêng Việt Nam hiăng mơhnhôk châ 20 rơtal liăn vâ tơkŭm po mâu tơdroăng ki kal tŏng kum ăm vâi hdrêng ai tơdroăng rêh ối pá puât môi tiah: diâp hnoăng liăn hriâm rơkê, rơxế mái, kơdroh trâm xía vâ, hbrâ mơdât klâk têa, tŏng kum mâu kong pơlê pêi pro mâu tơdroăng Khế pêi tơdroăng tŏng kum vâi hdrêng ƀă hía hế.