VOV4.Xơ Đăng - Kơxo lơ 23/8, a Hà Nội, jâ Võ Thị Ánh Xuân, Kăn xiâm phŏ hnê ngăn tơnêi têa, Hô̆i đŏng Kring vế Khu xiâm rak liăn ‘măn kŭm vâi hdrêng Việt Nam hiăng troh lăm pôu, hbru tơmeăm ăm vâi hdrêng ki pâ hoăng tơliê a Hngêi pơkeăng Việt Nam - Cuba. Ing hơnăm 1997, Khu râk liăn ‘măn kơdĭng vâi hdrêng Việt Nam hiăng mơhnhôk pêi pro tơdroăng “Xua tơdroăng  vâ tó dêi vâi hdrêng’’ vâ kơjo kum liăn pâ pơlât ăm vâi hdrêng Việt Nam ki tro hoăng tơliê ki ôh tá lĕm ngiâ.

Kơ’nâi 25 hơnăm tŏng kum, troh nôkố hiăng ai lối 30 rơpâu ngế vâi hdrêng tung lâp tơnêi têa châ pâ pơlât. Hơnăm kố, tiô tối hdrối kô pơtối pâ pơlât ăm 2  rơpâu ngế vâi hdrêng a mâu kong pơlê kong ngo peăng Kơnhŏng, kơpong Tơdế tơnêi têa, Tây Nguyên ƀă Nam Bộ. Tiô tối hdrối tung rôh kố, a Hngêi pơkeăng Việt Nam - Cuba Khu tơrŭm cheăng Operation Smile kô kum ăm liăn pâ pơlât hoăng tơliê, hoăng rơkong, ai po pom a kơpong ngiâ ăm 800 ngế vâi hdrêng mâu kong pơlê peăng Kơnhŏng. Tâi tâng kơxô̆ liăn pâ pơlât apoăng ƀă liăn ăm kâ, ối, prôk vêh dêi vâi hdrêng châ khu kố tŏng kum tâi tâng.

Gương tơplôu ƀă tơbleăng