Tiô rơkong krếo thế dêi jâ Võ Thị Ánh Xuân, Kăn xiâm phŏ hnê ngăn tơnêi têa pin, kuăn pơtáu ki pơtối dêi Đan Mạch cho pôa Frederik ƀă kuăn kơdrâi pơtáu Mary Elizabeth lăm pôu Việt Nam sap hâi lơ 31/10 troh lơ 3/11. Kơxo lơ 1/11, klêi leh tơdah a tíu pêi cheăng dêi Kăn xiâm hnê ngăn tơnêi têa, jâ Võ Thị Ánh Xuân, Kăn xiâm phŏ hnê ngăn tơnêi têa hiăng tơpui tơno ƀă kuăn pơtáu ki pơtó dêi Đan Mạch.

Jâ Võ Thị Ánh Xuân, Kăn xiâm phŏ hnê ngăn tơnêi têa tơdah hnối tơpui tono ƀă kuăn pơtáu ki pơkuâ pơtó Frederik

Jâ Võ Thị Ánh Xuân phiu ro hlo tơdroăng tơrŭm cheăng tung hên tơdroăng pơla péa tơnêi têa dế mơnhông trâu rơdâ ƀă mơ-eăm pêi tâi tâng mâu kơvâ cheăng, malối ‘na ‘no liăn cheăng mơjiâng tơmeăm khoăng, tơrŭm tâp trăng hnhâng troăng on tơhrik, ‘na hyôh kong prâi, hmâ ƀă hyôh kong prâi hơ’lêh, hnê hriâm - hnê mơjiâng tuăn ngôa rơkê, mơhno túa lĕm tro ƀă hía hé.

Jâ Võ Thị Ánh Xuân, Kăn xiâm phŏ hnê ngăn tơnêi têa púi vâ rế ai hên khu mơdró Đan Mạch ‘no liăn cheăng tê mơdró châ tơ ƀrê a Việt Nam tung mâu kơvâ cheăng ki Đan Mạch ai rơdêi ƀă Việt Nam kal vâ.