VOV4. Xơ Đăng - Pơtối lăm pôu kong têa Kŏng hòa Croatia,  jâ Võ Thị Ánh Xuân, Kăn xiâm phŏ hnê ngăn tơnêi têa hiăng hôp tơpui ƀă pôaZoran Milanović, Kăn xiâm pơkuâ kong têa Croatia. A rôh hôp, jâ Võ Thị Ánh Xuân tối phiu ro ƀă hlối mơnê kơ kăn xiâm pơkuâ kong têa Croatia hiăng mơdoh hâi  tơdah khu kăn, tối Việt Nam đi đo nhoăm ƀă púi vâ mơdêk tơrŭm cheăng ƀă  tơrŭm ing hên tơdroăng pơla péa tơnêi têa hiăng châ mơjiâng ing hên chât hơnăm hdrối, drêng Croatia u ối tơdjuôm tung kong têa Nam Tư ton nah.

Kăn xiâm pơkuâ kong têa Croatia tơdah jâ Võ Thị Ánh Xuân, Kăn xiâm phŏ hnê ngăn tơnêi têa

Péa ngế kăn xiâm hiăng vâ môi tuăn mơdêk tơpui tơno ƀă khu kăn ƀă hlối trâm mâ khu râ kăn, malối mâu kăn xiâm hlối môi tuăn mâu tơdroăng pơkâ mơdêk tơrŭm cheăng pơla péa pâ, malối ‘na cheăng kâ-tê mơdró, ‘no liăn cheăng xuân po rơdâ tơrŭm cheăng ‘na mâu tơmeăm khoăng ai hlâu má môi cho ôm hyô, ’na troăng prôk pơto chơ tơmeăm, hnê hriâm ƀă hnê mơjiâng tuăn ngôa rơkê, pơtâp ivá.

VOV Tây Nguyên/Tơplôu: Gương