Kơxo lơ 29/6, jâ Võ Thị Ánh Xuân, Kăn xiâm phŏ hnê ngăn tơnêi têa lăm pôu ƀă pêi cheăng a kong pơlê Cao Bằng; lăm pôu, diâp kơxuô tơmeăm rơpŏng ai hnoăng kăch măng, mơngế ai hnoăng tơnêi têa a tơring Hà Quảng. Jâ Võ Thị Ánh Xuân rơtế khu râ kăn pêi cheăng hiăng troh chôu nhang, pleăng hơvĭng  reăng tíu koh tơbâ Pôa Hồ Chí Minh, Kăn xiâm hnê ngăn tơnêi têa hneăng apoăng  ƀă pêt loăng tơbâ a Kơpong chôu ‘măn tơmeăm khoăng Tơnêi têa ki má môi Pác Bó (cheăm Trường Hà, tơring Hà Quảng).

 Tung roh lăm pôu pêi cheăng, Kăn xiâm phŏ hnê ngăn tơnêi têa hiăng diâp 20 toăng hngêi ăm rơpŏng kơtiê; diâp 50 kơxuô tơmeăm ăm rơpŏng ai hnoăng tơnêi têa, tŏng kum ƀă 200 ngế hok tro ai tơdroăng rêh ối pá puât mơ-eăm tung hriâm tâp tung tơring Hà Quảng.

Mơnhên mâu tơdroăng mơ-eăm ƀă ki châ tơƀrê mơnhông mơdêk cheăng kâ – rêh ối pơlê pơla dêi Hà Quảng xuân môi tiah kong pơlê Cao Bằng châ tơƀrê tung pơla kố nah, jâ Võ Thị Ánh Xuân pơchân tối kong pơlê kal pơtối mơhnhôk mâu khu cheăng tơmâng rak ngăn tơdroăng rêh ối kuăn pơlê, mơdêk khôi túa pơlê xiâm kăch măng, mơnhông mơdêk tơmeăm ki ai hlâu, vâ mơhnhôk mơ’no liăn cheăng, mơnhông cheăng kâ, mơdêk tơdroăng rêh ối kuăn pơlê.