VOV4.Xơ Đăng - Kơxê lơ 16/9, jâ Võ Thị Ánh Xuân, kăn xiâm phŏ hnê ngăn tơnêi têa pơkuâ po Rôh hôp Hô̆i đong Khu râng liăn tŏng kum vâi hdrêng Việt Nam vâ mơnhên tối klêi kơ’nâi tơdroăng cheăng dêi Hô̆i đong tŏng kum 8 khế hdrối nah, tơbleăng hnoăng cheăng mâu khế mơ’nui hơnăm kố. Jâ Võ Thị Ánh Xuân tối nhên, tung pơla xơpá tơdjuôm môi tiah nôkố, la ƀă hiâm mơno ƀă hnoăng cheăng pôu râng dêi tơná Hô̆i đong tŏng kum hiăng pơkâ mơ’no tơdroăng mơhnhôk tơlo 100 rơtal liăn tung hơnăm kố vâ tŏng kum ăm 100 rơpâu ngế vâi hdrêng ƀă hiăng châ lối 50% túa pơcháu.

Tâ tá rôh hôp

Vâ mơdêk kơxô̆ liăn ƀă tŏng kum ăm hên tâ vâi hdrêng ki ai tơdroăng rêh ối xơpá, kăn xiâm phŏ hnê ngăn tơnêi têa pơkâ thế Khu râng séa ngăn nhên tơdroăng pêi pro vâ mơjiâng túa pơkâ tung hơnăm la ngiâ ‘na tơdroăng ki tŏng kum vâi hdrêng ƀă mơhnhôk mâu kơxô̆ liăn ăm tơtro. Tung mê, mâu tơdroăng cheăng tŏng kum tơkŭm tung mơdêk kum trếo piê, pâ ăm mâu vâi hdrêng ki hoăng tơliê, pâ plâi nui sap ing tơxĭn, pro hngêi ối pơtê a mâu hngêi hriâm kơpong xơpá.

Katarina Nga tơplôu ƀă tơbleăng