VOV4.Xơ Đăng - Hdrối mê, tiô rơkong krếo thế dêi jâ Võ Thị Ánh Xuân, Kăn xiâm hnê ngăn tơnêi têa, pôa Bounthong Chitmany, Kăn cheăng tung Khu xiâm kal kí, Kăn xiâm hnê mơhno Khu pơkuâ cheăng Đảng kong têa Lếo, Kăn xiâm phŏ hnê ngăn kong têa Lếo lăm pôu pêi cheăng Việt Nam sap hâi lơ 17 – 19/7/2022. Mê, kơxê lơ 17/7, klêi kơ’nâi leh tơdah păng ‘nâng, jâ Võ Thị Ánh Xuân hiăng tơpui ƀă pôa Bounthong Chitmany a Tíu pêi cheăng Kăn xiâm hnê ngăn tơnêi têa.

Jâ Võ Thị Ánh Xuân, Kăn xiâm phŏ hnê ngăn tơnêi têa ƀă pôa Bounthong Chitmany, Kăn xiâm phŏ hnê ngăn kong têa Lếo

Tơpui tơno ‘na mơnhên troăng pêi la ngiâ thăm tơrŭm cheăng pơla péa pâ tung la ngiâ, péa Kăn xiâm phŏ hnê ngăn tơnêi têa pơtối rak mâu roh lăm pôu pêi cheăng, trâm mâ khu râ kăn xiâm tung mâu tơdroăng pêi cheăng; tơkŭm po tơtro mâu tơdroăng ki kơnâ ƀă ki tơxâng tung hơnăm rŭm môi tuăn pơla Việt Nam – Lếo, Lếo – Việt Nam 2022; tơrŭm pêi pro kơtăng ƀă châ tơƀrê mâu tơdroăng môi tuăn khu râ kăn xiâm.

Péa pâ mơnhên pơtối mơ-eăm rơtế mâu kong têa ối tung khu tơrŭm đi đo rak krá tơniăn mâu pơkâ, ki kơnâ, troăng pêi tơdjuôm ‘na mâu tơdroăng tơdjâk troh hơniâp lĕm, tơniăn tung kơpong; môi tuăn troăng tơmiât pêi tơleăng mâu tơdroăng tung kơpong ƀă tung lâp plâi tơnêi ƀă troăng pêi mơjiâng hơniâp lĕm tiô tơdroăng nhuô̆m luât lâp plâi tơnêi.

A Sa Ly tơplôu ƀă tơbleăng