Hâi lơ 24/4, jâ Võ Thị Ánh Xuân, Kăn xiâm phŏ hnê ngăn tơnêi têa rơtế ƀă mâu kăn Kuô̆k hô̆i kong pơlê An Giang trâm mâ kuăn pơlê hdrối rôh hôp má 5, Kuô̆k hô̆i hneăng 15, a tơring Thoại Sơn ƀă pơlê kong kơdrâm Long Xuyên, kong pơlê An Giang. Tơmâng xo ƀă khĕn kơdeăn mâu tơdroăng cheăng ki kong pơlê An Giang, tơring Thoại Sơn ƀă pơlê kong kơdrâm Long Xuyên hiăng châ pêi pro tung hơnăm hdrối kô nah, jâ Võ Thị Ánh Xuân púi vâ, tung tơdroăng cheăng kâ lâp plâi tơnêi ai hên ki tơ’lêi ƀă xơpá.

Kăn hnê ngăn kong pơlê An Giang pơtối tơmiât, xúa ki rơdêi ai hlâu vâ mơnhông kơvâ pêi chiâk tơniăn rĕng, tơƀrê ƀă krá tơniăn, tơƀrê ƀă krá ton, pro pơxúa hên, kuăn pơlê châ xo tơ’mot liăn hên. Kăn xiâm phŏ hnê ngăn tơnêi têa hnê mơhno, kong pơlê An Giang achê kố mơdêk rĕng ki ‘no liăn mơjiâng tơmeăm khoăng tơnêi têa, hlối cho mơdêk rĕng ăm mơnhông mơdêk, ki kal tâ cho xiâm vâ mơnhông cheăng kâ-rêh ối, tơ’mot khu ‘no liăn cheăng. Thế tơniăn tung rêh ối, cheăng pêi ăm kuăn pơlê, malối mâu khu ki pá puât.