VOV4.Xơ Đăng - Kơmăng lơ 31/7, a kong pơlê Hòa Bình hiăng tơkŭm po Tơdroăng ngê̆ thuât ‘’Hơniâp lĕm – Tơdrá chuât pơlê Mường’’, tơdah Ƀâng kheăn kơdeăn 2 tơmeăm Mơhno khôi túa lĕm tro tơmeăm ki ôh tá hlo ƀă mâ tơnêi têa: Tơdroăng ki hlê plĕng rơkê Lĭch tre ƀă Leh mơdĭng tiô khôi vâi krâ nah Khai Hạ dêi hdroâng kuăn ngo Mường kong pơlê Hòa Bình.

Jâ Võ Thị Ánh Xuân, Kăn xiâm phŏ hnê ngăn tơnêi têa xông tơpui a Tơdroăng pêi cheăng

Veăng tơdroăng mơdĭng ai jâ Võ Thị Ánh Xuân, Kăn xiâm hnê ngăn tơnêi têa rơtế khu râ kăn pơkuâ mâu khu xiâm, kơvâ cheăng tơnêi têa. Xông tơpui a roh leh, Kăn xiâm phŏ hnê ngăn tơnêi têa tối, ƀă tơdroăng mơnhông ton nah rêh ối ton a Hòa Bình, mơngế Mường hiăng mơjiâng hên tơmeăm mơhno khôi túa lĕm tro ki ôh tá hlo ƀă mâ ki má môi, kum pro thăm hên khôi túa lĕm tro dêi 54 hdroâng mơngế nhŏng o. Tung mê tơdroăng ki hlê plĕng rơkê lĭch tre ƀă Leh mơdĭng tiô khôi vâi krâ nah Khai Hạ châ pơ-ôu pơ-eăng Tơmeăm mơhno khôi túa lĕm tro tơnêi têa ƀă tơdroăng pêt mơjiâng tơmeăm pêi lo ing chiâk deăng pêt báu klâng.

Kăn xiâm phŏ hnê ngăn tơnêi têa mơnhên, mâu tơmeăm ki kơnâ ki má môi kố cho kơxái vâ tơdjâ tơrŭm pơlê pơla, kum kuăn pơlê a tơnêi kố tơkâ hluâ pá puât, pơloăng mơnúa vâ rak krá tơniăn tung xông prôk, mơjiâng ƀă mơnhông mơdêk pơlê xiâm rế hía rế kro mơdrŏng.

A Sa Ly tơplôu ƀă tơbleăng